धुलाम्य हुलाकी सडक,  रोगसँग जुध्दै आमजनता

न्यूज ब्यूरो ||
जनकपुरधाम, १० बैशाख । जनकपुरदेखि कमला नदिसम्म रहेको हुलाकी सडकमा धुला नै धुला भएपछि आवतजावत गर्ने आम जनता रोगसँग लडाई गर्न बाध्य भएका छन् ।

हुलाकी सडक निर्माणका जिम्मा पाएका ठेकेदारको लापरवाहीले गर्दा हुलाकी सडकमा मात्र धुलो नै धुलो भएपछि ग्रामिण भेकका सर्वसाधारणहरुलाई जनकपुरसम्म आवागमन गर्न कठिनाई भएको छ भने विभिन्न प्रकारका रोगहरुको शिकार समेत भइरहेको देखिएको छ ।

केही दिनअघि धनुषा निर्वाचन क्षेत्र नं. २ का प्रतिनीधिसभा सदस्य उमा शँकर अरगरियाले हुलाकी राजमार्ग आयोजका डिईसँग भेट गरी हुलाकी सडकको अवस्थाबारे जानकारी गराउँदै असार मसान्तभित्र सडक आवतजावतका लागि परिपक्क बनाउनुपर्ने आग्रह गरेपनि हालसम्म कुनै प्रकारको प्रगति देखिएको छैन ।

धनुषाबाट प्रदेशसभा सदस्य भएका साँसद किशोरी साहको ठेकेदारीमा हुलाकी सडकको निर्माण कार्य अघि बढेपनि ठेकेदारबाट साँसद भएपछि साहले तहगत ठेकेदार राखी कार्य कछुवा गतिमा सँचालन गरेको छ ।

दैनिक रुपमा जिल्लाको पूर्वी भेकका सर्वसाधारणहरुले अति धुलोका कारण सास्ती भोग्नु परिरहेको छ ।