न्यूज ब्यूरोको प्रभावः सिरहाको चोहर्बा चोकबाट हटाइयो सबै दलको झण्डा

न्यूज ब्यूरो, जनकपुरधाम । पूर्व पश्चिम राजमार्ग अन्तर्ग सिरहाको चोहर्बास्थित सार्वजनिक पार्कमा लगाइएको विभिन्न दलको झण्डा हटाइएको छ ।

गत कार्तिक २३ गते बुधबार न्यूज ब्यूरोले उम्मेदवारहरुको बदनियतले सिरहाको चोहर्वा पार्क कुरुप, आचारसंहिता मिचेर दलको झण्डा शिर्षकको समाचार प्रकाशित गरेपछि प्रशासनले सोमाथि एक्सन लिँदै सबै दलको झण्डा हटाइदिएको हो ।

शुक्रबार बिहानै ईलाका प्रहरी कार्यालय मिर्चैयाबाट खटि आएको टोलीले सो पार्कको बाँकी झण्डाहरु हटाएको थियो । सो अघि जनमत पार्टीका कार्यकर्ताहरुले विहिबार रातीमै दलको झण्डाहरु हटाएको थियो ।

बुधबार राती समाचार प्रकाशित भएपछि डा. सिके राउत नेतृत्वको जनमत पार्टीका कार्यकर्ताहरुले सार्वजनिक पार्कबाट दलहरुको झण्डा हटाएको थियो । बाँकी रहेको चुनावी प्रचार प्रसार ईलाका प्रहरी कार्यालय मिर्चैयाको टोलीले सफाई गरेर गएको स्थानीयहरुले बताएका छन् ।

समाचारपछि सिरहाका प्रमुख जिल्ला अधिकारी लालबाबु कवारीले अब सार्वजनिक स्थानमा लगाएको त्यस्ता प्रचार प्रसार समाग्री कडाईका साथ हटाइने बताए ।