मेयर र उपमेयरको झगडाले कमला नगरपालिकाका कर्मचारीहरु भोकै, आजदेखि आन्दोलन

न्यूज ब्यूरो, जनकपुरधाम । पूर्वी धनुषाको कमला नगरपालिकाको अवस्था दिनानुदिन जटिल हुँदै गएको बेला कर्मचारीहरुले पनि आजदेखि आन्दोलन गर्ने भएको छ ।

नगरपालिकाका मेयर विशेश्वर प्रसाद यादव र उपमेयर शिला देवी मण्डलबीचको आपसी झगडाले नगरपालिकाका कर्मचारीहरु दशैँ जस्तो पर्वमा पनि भोकै बस्नु परेको हो ।

मेयर उपमेयरको व्यक्तिगत झगडाले सिँगो नगरपालिका नै ठप्प भएको छ । यतिबेला प्रथम चौमासिकको कार्यक्रमहरु प्रारम्भ भईसक्नुपर्नेमा बजेट समेत ल्याउन नसकेका कमला नगरपालिकामा आजदेखि आन्दोलन हुने भएको छ ।

नगरपालिकाभित्रका शिक्षक कर्मचारीहरुले आजदेखि मेयर र उपमेयर विरुद्ध आन्दोलन गर्ने भएको छ । उनीहरुले तलबभत्ताको माग गर्दै आजदेखि आन्दोलन गर्न लागेको जनाइएको छ ।

यो आर्थिक वर्षको कुनै पनि तलब भत्ता नदिएको भन्दै शिक्षकहरुले आज नगरपालिकाको कार्यालय अगाडी आन्दोलन गर्ने भएको छ । उनीहरुले प्रदर्शनसहित धर्ना दिने कार्यक्रम रहेको जनहित निम्न माध्यमिक विद्यालयका शिक्षक रोहित यादवले जानकारी दिए ।

मेयर र उपमेयर दुवै एउटै पार्टी नेपाली काँग्रेसबाट निर्वाचित भएका जनप्रतिनीधि हुन् । नगरपालिका ठप्प भएपछि स्थानीयहरुको आक्रोस बढदै गएको छ ।