मेयर उपमेयरबीचको मनोयुद्धले कमला नगरपालिका अपाङग, आक्रोसित हुँदै नागरिक

न्यूज ब्यूरो, जनकपुरधाम । पूर्वी धनुषाको कमला नगरपालिकाको नगर प्रमुख र नगर उपप्रमुखबीचको मनोयुद्धले कमला नगरपालिकाको अवस्था जर्जर भएको छ ।

नगर प्रमुख बिशेश्वर प्रसाद यादव र उपमेयर शिला देवी मण्डलबीचको मनोयुद्धले कमला नगरपालिका अपाँग भएको छ ।

यसअघि विधिपूर्वक निर्वाध सँचालन हुँदै आएको कमला नगरपालिका नयाँ जनप्रतिनीधिहरुको दलगत र नैतिकविहिन राजनीतिले कमला नगरपालिकालाई अपाँग बनाइएको छ ।

मेयर उपमेयरबीचको जुहारी र ईगोको कारण कमला नगरपालिका अनिर्णयको बन्दी भएको छ । कमला नगरपालिकाले अहिलेसम्म योजना ल्याउन नसकेपछि जनता मारमा परेका छन् ।

नगरपालिकाका मेयर र उपमेयर दुई खेमामा बाँडिएपछि नगर परिषद् सम्पन्न भएपनि अहिलेसम्म योजना पेश नहुँदा कार्यालय सँचालन हुन सकेको छैनन् ।

कमला नगरपालिकाको ९ वटा वडामध्ये ६ वडा मेयर यादवको पक्षमा छन् भने बाँकी ३ वडा उपमेयर पक्षधर रहेका छन् । उपमेयर पक्षधरले अहिलेसम्म योजना पेश नगर्दा योजना प्रविष्ट हुन नसकेर कार्यालय सँचालनमा अवरोध भएको छ ।

कार्यालय सँचालनको लागि नगर प्रमुख विशेश्वर प्रसाद यादवले खासै चासो देखाउँदैनन् । ईगो पालेर बसेका मेयर यादव र उपमेयर मण्डल दुवै जना एउटै पार्टीबाट निर्वाचित भएका जनप्रतिनीधि हुन् ।

नीति तथा कार्यक्रम प्रस्तुतको बेला गत असारमा उपमेयर मण्डलले मेयर, अधिकृत र कमला नगरपालिका विरुद्ध अदालतमा मुद्दा हालेपछि मेयर यादव आक्रोसित बनेका थिए । उनले एउटै दलबाट निर्वाचित भएपनि आन्तरिक छलफल नै नगरी नगरसभामाथि मुद्दा दर्ता गराएको भन्दै आक्रोस पोख्दै आएका छन ।

उपमेयर मण्डल निरन्तर मेयरसँग छलफलको लागि प्रयास गरेपनि मेयरको अहमता र घमण्डले कमला नगरवासी अनिर्णयको बन्दीको शिकार भएका छन् ।

कमला नगरपालिकाको वडा नं. ५, ७ र ९ ले अहिलेसम्म योजना पेश नगरेपछि कमला नगरपालिका अपाँग भएको छ । यसले यी तीन वडाका वडाध्यक्षप्रति नागरिकहरु आक्रोसित भएका छन् भने मेयर उपमेयरप्रति समेत आक्रोसित भएका छन् ।