प्रदेश २ को नीति तथा कार्यक्रम उपर छलफल आज

न्यूज ब्यूरो ||
जनकपुरधाम, ३ बैशाख । प्रदेश नम्बर २ को सोमवार बस्ने संसद बैठकमा सरकारको नीति तथा कार्यक्रममाथि छलफल सुरु हुने भएको छ ।

सरकारको नीति तथा कार्यक्रम प्रदेश प्रमुख रत्नेश्वर लाल कायस्थले बुधवार प्रस्तुत गरेका थिए । उक्त बैठकपछि सदनको बैठक तीन दिनका लागि स्थगित गरिएको थियो । नीति तथा कार्यक्रममा सरकारले कृषि, पर्यटन, उद्योगलाई प्राथमिकतामा राखेको छ ।

सरकारको सय दिने कार्यक्रम, ११ बुँदे प्रतिबद्धता लगायतका कार्यक्रमहरुपनि नीति तथा कार्यक्रममा समावेश गरिएको छ । संसदमा नीति तथा कार्यक्रममाथि सोमवार छलफल हुने र मंगलवार पारित गर्ने संभावना छ ।

सरकारले बुधवार बजेट प्रस्तुत गर्ने कार्यक्रम रहेकाले नीति तथा कार्यक्रममाथिको छलफललाई मंगलवार टुंग्याउने अनुमान गरिएको छ ।

नीति तथा कार्यक्रममाथिको छलफलमा भाग लिने साँसदहरुले बजेटमा संसदिय विकास कोषको प्रबन्ध गर्नुपर्ने आवाज उठाउन सक्ने संभावना छ ।

सरकारले नीति तथा कार्यक्रममा संसदिय विकास कोषको बारे चर्चा गरेको छैन् । अनौपचारिक छलफल गर्न थालेका साँसदहरुले सदनमा आवाज उठाउन सक्ने अनुमान गरिएको छ ।

संसदिय कोषका लागि सत्तारुढ र विपक्षी दलका साँसदहरु एकै स्वरमा आवाज उठाउन थालेका छन् ।संघिय संसदका साँसदहरुले १० करोड माग गरेको बेला प्रदेश साँसदहरुले पनि रकम माग गरेका छन् ।

उनीहरुले कम्तिमा १० लाख बजेटमा विनियोजन गर्नुपर्ने धारणा व्यक्त गर्न थालेका छन् । तर सरकारले यस सम्बन्धमा कुनै धारणा सार्वजनिक गरेको छैन् ।नीति तथा कार्यक्रम सदनबाट पारित भए लगतै अर्थमन्त्री विजय कुमार यादवले बजेट प्रस्तुत गर्ने तयारी गरेका छन् । भनेर आजको जनकपुर टुडेमा समाचार छ ।