ओरकेष्ट्रा बारे वडाध्यक्ष यादवको समाचार लेखेको भन्दै कर्मचारीले सँचारकर्मी धम्काए

न्यूज ब्यूरो, जनकपुरधाम । धनुषाको धनौजी गाउँपालिका वडा नम्बर ३ का वडाध्यक्ष रामनारायण यादवको बारेमा समाचार लेखेको भन्दै गाउँपालिकाका उद्यम विकास सहजकर्ता फेकन यादवसहित केही पूर्व जनप्रतिनीधिले सँचारकर्मीलाई धम्काएका छन् ।

बिहिबार प्रहरीको रोहबरमा विद्यालयभित्रै ओरकेष्ट्रा, ५०० दिएर लहँगा उठावाउँदै वडाध्यक्ष यादव शिर्षकको समाचार न्यूज ब्यूरोले प्रकाशित गरेपछि वडाध्यक्ष यादवको तर्फबाट उद्यम विकास सहजकर्ता फेकन यादवले सँचारकर्मीलाई बोलाएर धम्काएका छन् ।

१०/१२ जनाको समूहमा आएका वडाध्यक्ष यादवले न्यायिक समितिका सदस्य फेकन यादवलाई अघि सारेर अभद्र गाली गलौज गर्न लगाएको अडियो रेकर्डिँगमा सुनिएको छ ।

न्यूज ब्यूरोमा स्ट्रीन्जरको काम गर्दै आएका मुकेश पण्डितलाई https://enewsbureau.com/news-details/13949/2022-07-30 फेकन यादव, वडाध्यक्ष रामनारायण यादव, पूर्व वडासदस्य राजकुमार महतो, जीतेन्द्र राउत लगायतका व्यक्तिहरुको समूहले उनलाई वडा नं. ३ को कटैयाचोकमा रोकेर कुटपिटको धम्की दिएका छन् ।

कुनै प्रकारको समाजिक विवाद हुँदा स्थानीय सरकारको न्यायिक समितिमा जाने गरिन्छ, तर न्यायिक समितिकै सदस्यले कानुनभन्दा पनि भौतिक रुपमा कुटपिटको प्रयास गरेको आरोप पण्डितले लगाएका छन् ।

विद्यालय परिसरभित्र ओरकेष्ट्रा नचाएको समाचारको विषयलाई लिएर वडाध्यक्ष रामनारायण यादवले न्यायिक समिति सदस्य फेकन यादवलाई प्रयोग गरी पण्डितलाई बोलाएर धाकधम्की दिएको आरोप लगाएका छन् ।

समाचार डिलिट गर्नुपर्ने दबाबको साथै समाचार नहटाइए घर पसेर कुटपिट गर्ने धम्की समेत दिएको पण्डितले गुनासो गरेका छन् । उनले विद्यालय परिसरमा ओरकेष्ट्रा भएको जानकारी आफू मात्र नदिएर समाजिक सँजालहरुमा भिडियो नै सार्वजनिक भएको बताउँदै आफूले साझा गर्दा धाकधम्की दिएको बताए ।

समाचार तयार पार्दा सम्बन्धित पक्षहरुसँग कुराकानी गरेर सन्तुलित बनाएपनि उद्यम विकास सहजकर्ता फेकन यादवले धाकधम्की दिँदै कुन आधारमा लेखेको भनेर दुरव्यवहार समेत गरेको बताए ।

धनुषामा ओरकेष्ट्रा प्रतिबन्ध लगाएको अवस्थामा पनि ओरकेष्ट्रा गराएको भन्दै धनुषाका प्रहरी प्रमुख (एसपी) बसन्त रजौरेले वडाध्यक्षसहित अन्य समाजका व्यक्तिहरुलाई बोलाएपछि उनीहरु आक्रोसित भएका छन् ।

यद्यपी, उद्यम विकास सहजकर्ता फेकन यादवले कार्यक्रम भएको स्वीकार गरे । उनले विद्यालय परिसरमै मन्दिर भएर साँस्कृति कार्यक्रम गरेको बताए । उनले भने, –“ओरकेष्ट्रा गरेको होईन, लौण्डा नाच मात्र भएको छ । केटीहरु थिएनन, केटाहरु मात्रै थियो ।”

यसअघि वडाध्यक्ष यादवले कार्यक्रम नै नभएको भनेर दाबी गरेका थिए । उनले कुनै पनि प्रकारको कार्यक्रम नभएको दाबी गरेपनि उनकै नजिकीहरुले कार्यक्रम भएको बताएपछि वडाध्यक्ष यादवको बोली फुस्स भएको छ ।

समाचारप्रति कुनै आपत्ति भए खण्डन गर्ने अधिकार हुँदाहुँदै वडाध्यक्ष यादव र उद्यम विकास सहजकर्ता फेकन यादवले बल जबरदस्ती धाकधम्की दिएको बताईएको छ । यसले सरकारको तलब खाने कर्मचारी र जनप्रतिनिधीको कुशलताप्रति प्रश्न खडा भएको छ ।