प्रदेश २ को स्थायी राजधानी र नाम बारे सहमति जुटाइदै

न्यूज ब्यूरो ||
जनकपुरधाम, ३० चैत्त । प्रदेश नम्बर २ को नामाकरण र स्थायी राजधानी तोक्न प्रदेश सरकारले सहमति जुटाउन छलफल थालेको छ ।

प्रदेशका मुख्यमन्त्री, मन्त्री, राज्यमन्त्री, साँसद र स्थानीय तहका पदाधिकारहिरुको तलब, सुविधा सम्बन्धी परामर्श समितिको विहिवार बसेको बैठकमा प्रदेशको नाम र स्थायी राजधानी बारे छलफल भएको छ ।

प्रदेशको नाम र राजधानी तोक्न ढिला भईरहेको भौतिक पूर्वाधार मन्त्री जितेन्द्र सोनलले बैठकमा उठाएपछि अनौपचारिक छलफल भएको थियो ।

‘पहिले प्रदेशको राजधानी तोकौ’ नेपाली काँग्रेस संसदीय दलका नेता रामसरोज यादवले भने, ‘स्थायी राजधानी र प्रदेशको नामाकरणको प्याकेजमै सहमति खोज्नु पर्छ ।’सत्तारुढ दलहरु संघिय समाजवादी फोरम नेपाल र राष्ट्रिय जनता पार्टी (राजपा) नेपालले प्रदेशको नामाकरण ‘मधेश प्रदेश’ गर्ने तयारीमा छन् ।

तर काँग्रेस र एमालेका केहि साँसदहरु पहिचानसित जोडिएको नाम राख्नु पर्ने तर्क गर्दै आएका छन् ।

प्रदेशको राजधानी जनकपुरधामलाई बनाउनु पर्नेमा सत्तारुढ दल र विपक्षी दलहरुमा खासै मतभिन्नता देखिएको छैन् । तर विपक्षी दलका नेताहरुले राजधानी तोकिएपछि मात्र प्रदेशको नाम तोक्नु पर्ने धारणा राखेका छन् ।

मुख्यमन्त्रीको कार्यालयमा बिहान भएको बैठकमा परामर्श समितिले प्रदेशको मन्त्री र साँसदहरुको मर्यादाक्रम (प्रोटोकल) लाई तल झारेकाले पुरानै अधारमा सेवा, सुविधाहरु तोक्नु पर्ने लिखित सुझाव दिएको छ ।

हालको मर्यादाक्रममा प्रदेश मन्त्री र साँसदहरुलाई क्रमशः दशौ र चौधौ स्थानमा झारिएको छ ।यस अघि आठ र नौ नम्बरमा राखिएको थियो ।

‘स्थानीय तहका पदाधिकारीहरुको तलब, सुविधा अन्य प्रदेशले गरेको सरह नै मिलाएर दिनु पर्ने सुझाव हामीले दियौ’काँग्रेस संसदीय दलका नेता यादवले भने, पुरानै मर्यादाक्रम अनुसारको तलब, सुविधाहरु साँसदलाई व्यवस्था गर्न सुझाव दिएका छौ ।

यसमा सरकार र परामर्श समितिमा कुनै विमती नरहेको उनले बताए । सहमतिबाट नै संसदलाई अगाडी बढाउने पक्षमा प्रदेश सरकार देखिएको छ ।बैठकमा एमाले संसदीय दलका नेता सत्यनारायण मण्डल अनुपस्थित रहेका थिए ।

माओवादी केन्द्र संसदीय दलका नेता रामचन्द्र मण्डल बैठक सुरु हुनु अगावै बाहिरिएको नेता यादवले जनाए । भनेर आजको जनकपुर टुडे राष्ट्रिय दैनिकमा समाचार छ ।