जनकपुरमा दिनदहाडै एक महिला लुटिए

न्यूज ब्यूरो, जनकपुरधाम | मधेश प्रदेशको राजधानीस्थित दिनदहाडै एक महिला लुटिएकी छन् ।

जनकपुरधामस्थित एक बैँकबाट घर फर्किदै गर्दा दिनदहाडै एक महिला लुटिएको जिल्ला प्रहरी कार्यालय धनुषाले जनाएको छ ।

जनकपुरधाम उपमहानगरपालिका वडा नम्बर १ मिल्स एरियास्थित रहेको एभेरेष्ट बैंकबाट पैसा झिकेर घर फर्किने क्रममा सोही स्थान बस्ने शर्मिला यादवको रकम लुटिएको हो । उनको दुई लाख रुपैयाँ लुटिएको जनाइएको छ ।

अज्ञात समूहले सोमबार दिउँसो आफ्नो घर फर्किदै गर्दा उनले बैँकबाट झिकेको सबै रुपैयाँसहित अन्य समानहरु लुटेको प्रहरीले जनाएको छ ।

वडा नम्बर–१ मिल्स एरियास्थित एभरेष्ट बैंकबाट रकम निकालेर घर फर्किने क्रममा मोटरसाइकलमा आएका दुईजनाले यादवको रकम लुटेको प्रहरीको भनाइ छ ।

साउदीमा रहेका शर्मिलाका श्रीमान् देवशरणले पठाएको रकम बैंकबाट झिकेर घरतर्फ जान लाग्दा मोनास्टिक स्कुलनजिकै एउटा मोटरसाइकलमा आएका दुईजनाले आफूले बोकको झोला हातबाट लिएर भागेको शर्मिलाले बताइन् ।

झोलामा २ लाख, नागरिकता, बैंकसम्बन्धी कागजात र थप ५ सय रहेको उनले बताएकी छन् ।

लुटेराहरुको खोजी भइरहेको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक प्रदीपबहादुर क्षेत्रीले जानकारी दिए ।