बैँकको कर्मचारी हुँ भनी बैँकबाट वृद्ध महिलाको वृद्धभत्ता निकालेर भाग्ने यादव पक्राउ

न्यूज ब्यूरो, जनकपुरधाम । मधेश प्रदेशस्थित बैँकको कर्मचारी हुँ भनी वृद्ध महिलाको वृद्धभत्ताको रकम निकालेर भाग्ने एक जना युवक पक्राउ परेका छन् ।

विहिबार दिउँसो करिब १ः३० बजेको समयमा विदेह नगरपालिकाको तिनकोरियास्थित रहेको एनआईसी एसिया बैँकबाट महिलाको वृद्धभत्ता झिकेर भागेको आरोपमा धनुषाको कमला नगरपालिका वडा नम्बर २ माचि झिटकैया बस्ने रामविलास यादवको छोरा बर्ष २३ को सँतोष यादव पक्राउ परेका छन् ।

धनुषाको विदेह नगरपालिका वडा नम्बर १ बस्ने बर्ष ७३ की वृद्ध कुम्हिया देवी भिनभारले तिनकोरियास्थित रहेको एनआईसी एसिया बैँकमा वृद्धभत्ता छुटाउन जाँदा यादवले आफू बैँकको कर्मचारी हुँ भनेर चेकबुक लिएका थिए ।

चेकबुक भरेर उनको खातामा रहेको २४ हजार रुपैयाँ निकालेर यादव फरार भएका थिए । वृद्धलाई आफू बैँकको कर्मचारी हुँ चेकबुक दिनुस म पैसा निकालिदिन्छु भनेपछि चेकबुक लिएर उनी पैसा झिकेर फरार भए ।

बैँकलाई यो कुरा जानकारी गराएपछि सिसिटिभी फुटेजको आधारमा उनको हुलिया खोज तलास गर्दै जाँदा कमला नगरपालिका वडा नम्बर २ माचि झिटकैयास्थित रहेको राजवंशी कोल्ड स्टोर नजिकबाट उनलाई पक्राउ गरिएको हो ।

उनलाई गएराती करिब ११ बजेको समयमा पक्राउ गरी खान तलासी गर्दा उनको साथबाट २० हजार रुपैयाँ नगद समेत फेला परेको जिल्ला प्रहरी कार्यालय धनुषाले जनाएको छ ।

ईलाका प्रहरी कार्यालय खजुरी मातहतको प्रहरी कार्यालय माचि झिटकैयाबाट खटि गएको टोलीले यादवलाई राती ११ बजे रक्सी पसल नजिकबाट पक्राउ गर्न सफल भएको हो ।

यादवलाई नियन्त्रणमा लिएर आवश्यक अनुसन्धानको लागि ईलाका प्रहरी कार्यालय खजुरीमा राखिएको जिप्रका धनुषाले जनाएको छ ।