सशस्त्र प्रहरीद्धारा झण्डै २ क्वीन्टल गाँजा बरामद

न्यूज ब्यूरो, जनकपुरधाम । सशस्त्र प्रहरी बलले गएराती झण्डै २ क्वीन्टल गाँजा बरामद गर्न सफल भएको छ ।

सशस्त्र प्रहरीको मधेश प्रदेश वाहिनीले गोप्य सूचनाको आधारमा खटाएको गस्ती टोलीले झण्डै दुई क्वीन्टल गाँजा बरामद गर्न सफल भएको हो ।

नेपालबाट भारत तर्फ लैजाँदै गर्दा एक भारतीय चारपाँग्रे गाडीमा राखिएको कुल १ क्वीन्टल ९२ किलो ४०० ग्राम गाँजा बरामद गरेको हो ।

मधेश प्रदेशको रौतहट जिल्लास्थित आईतबार राती १०ः१० बजेको समयमा राजपुर नगरपालिका वडा नम्बर ६ कुडियास्थित रहेको सुरक्षा बेस फतुवाबाट सशस्त्र प्रहरी ईन्सपेक्टर विनय श्रेष्ठको नेतृत्वमा खटि गएको प्रहरी टोलीले सो परिमाणको गाँजा बरामद गर्न सफल भएको हो ।

ईन्सपेक्टर श्रेष्ठको कमाण्डमा गएको १३ जनाको गस्ती टोलीले बगैँचामा लुकाएर पार्किँग गरि राखिएको डिए.एल. ४सिएनएनबी ६२२९ नम्बरको भारतीय गाडीबाट १४ किलो ८०० ग्रामको १३ वटा पोका बरामद गरिएको सशस्त्र प्रहरीको प्रदेश वाहिनीले जनाएको छ ।

सो गाडीसहितको १९२ किलो गाँजा प्रदेश बाहिनी गणबाट ईन्सपेक्टर दिल बहादुर कटुवालको नेतृत्वमा समेत गएको १९ जनाको थप टोलीले बरामद गाँजा र गाडी आवश्यक कारवाहीको लागि गणमा लगिएको जनाइएको छ ।

विगत केही दिनदेखि सशस्त्र प्रहरीका डिआईजी गणेश ठाडा मगरले सक्रियता देखाएपछि नेपाल भारतको सीमामा हुने यस्ता अपराधिक गतिविधिलाई निगरानी गरिदै आएको छ ।