२ नम्बर प्रदेश सरकारले नीति तथा कार्यक्रम पेश गर्ने

न्यूज ब्यूरो ||
जनकपरधाम, चैत २८ । सरकारको नीति तथा कार्यक्रम आगामी बुधबार प्रदेशभामा पेस गरिने भएको छ । सरकारले सोमबार नीति तथा कार्यक्रम दर्ता गराएसँगै प्रदेशसभा सचिवालयले उक्त मिति तोकेको हो ।

सरकारका प्रवक्ता एवं आर्थिक मामिला मन्त्री विजय यादवले नीति तथा कार्यक्रम प्रदेशसभामा पेस गर्ने तयारी पूरा भएको बताए । ‘संसद सचिवालयमा सोमबार नीति तथा कार्यक्रम दर्ता गरिएको छ,’ उनले भने, ‘संघीय सरकारले दिएको अनुदानकै आधारमा नीति तथा कार्यक्रम तयार गरिएको छ ।

बजेटमा मन्त्रालय व्यवस्थापन, पूर्वाधार निर्माण, तलव, ऐनकानुन निर्माण समेटिएको छ ।’ मन्त्रिपरिषदको सोमबार बसेको बैठकले थप दुई विधेयक ल्याउन सहमति समेत दिएको छ । मुख्यमन्त्री र मन्त्रीको सेवा– सुविधा सम्बन्धी तथा कानुन मस्यौदा सहजिकरण समिति गठनबारेका विधेयक ल्याउन लागिएको हो ।

बैठकले दुई विधेयक ल्याउन सैद्धान्तिक सहमति दिएको मन्त्री यादवले बताए । प्रदेशसभाको आइतबारको बैठकमा सांसदहरूले तत्काल नीति तथा कार्यक्रम ल्याउन सरकारसँग माग गरेका थिए । प्रदेश सरकारले आइतबार मात्र प्रदेशसभामा मुख्य न्यायाधिवक्ताको काम–कर्तव्य र अधिकार समेटिएको विधेयक पेस गरेको थियो ।

मंगलबार बस्ने प्रदेशसभा बैठकमा मुख्य न्यायधिवक्ता सम्बन्धि विधेयकमाथि छलफल हुने संसद सचिवालयले जनाएको छ । प्रदेश २ मा ७ संसदीय समिति बनाउन निमयमावली समितिले सिफारिस गरेको छ ।

राजपा सांसद रामनरेश राय प्रदेश नं. २ – सरकारको नीति तथा कार्यक्रम पेश सभापति रहेको समितिले तोकिएको एक महिनामा काम पूरा गर्न नसकेपछि बनाइएको उप–समितिले ७ संसदीय समिति बनाउन सिफारिस गरेको छ ।

उपसमितिले प्रदेशको नियम, ऐन र संसदीय समितिसहितको टुंगो लगाएर नियमावली समितिलाई बुझाएको छ । उप–समितिले सार्वजनिक लेखा, प्रदेश मामिला, अर्थ तथा योजना, विकास, कृषि तथा भुमि व्यवस्थापन, प्राकृतिक श्रोत तथा वातावरण र महिला, बालबालिका तथा सामाजिक न्याय सहितका समिति बनाउन नियमावली समितिलाई सुझाएको छ । आजको न्यूजपेपर दैनिक पत्रिकामा समाचार छ ।