तीर्थयात्रीलाई जनकपुरमा गरियो यसरी स्वागत

न्यूज ब्यूरो ||
जनकपुरधाम, २१ चैत्त ।
तीर्थयात्राबाट धार्मिक पर्यटनको विकास तथा तीर्थयात्राको महत्वलाई जनमानसमा पुर्नस्थापित गर्ने उद्देश्यले भारतको हरिहरनाथबाट मुक्तिनाथका लागि हिंडेको रथयात्रा मंगलबार जनकपुरधाम आईपुगेको छ ।

यसैक्रममा हरिहरनाथ मुक्तिनाथ सांस्कृतिक यात्रा २०१८ मा सहभागी श्रद्धालुहरुलाई मंगलबार एक भव्य सामारोहकाबिच जनकपुरधाममा स्वागत गरिएको छ । हरिहरनाथ मुक्तिनाथ सांस्कृतिक यात्रा २०१८ का राष्ट्रिय संयोजक सुरिता साहले उनीहरुलाई स्वागत गरेकि छिन ।

जनकपुरस्थित कलबार सेवा समितिमा आयोजित समारोहमा यात्रामा सहभागी सैकडौं श्रद्धालुहरुलाई स्वागत एवं अभिनन्दन गरिएको हो । चैत १७ गते भारतको सोनपुरबाट हिंडेको हरिहरनाथ–मुक्तिनाथ सांस्कृतिक यात्रा मुक्तिनाथमा दर्शनका लागि चैत २३ गते पुग्ने छ ।

०६८ साल चैत २१ गतेदेखि २६ गतेसम्म संचालनका साथ शुरुवात गरिएको हरिहरनाथ–मुक्तिनाथ सांस्कृतिक यात्रा यसवर्ष पनि आयोजना गरिएको हो । यो यात्रा परापुर्वकालमा पनि हुने गरेको आयोजकले जनाएको छ । यस यात्राले नेपाल र भारतबिचको सास्कृतिक सम्बन्धलाई कायम राख्न महत्वपुर्ण भूमिका खेल्ने गरेको हरिहरनाथ मुक्तिनाथ सांस्कृतिक यात्रा २०१८ का राष्ट्रिय संयोजक सुरिता साहले बताए ।

परापुर्वकालमा साधुसन्तको नेतृत्वमा धर्म परायण नारायणी तथा गंगाको संगम स्थल भारत स्थित हरिहर क्षेत्रबाट उद्गम स्थल नेपाल स्थित मुक्ति क्षेत्रसम्म नदीको किनारै किनार तिर्थ यात्रा गरिने भएकाले यसलाई महत्वका साथ हेरिएको छ ।

यात्रामा चवन्य ऋषिको आश्रम,बाबा सोमेश्वरनाथ,वाल्मिकी आश्रम,गज ग्राहयुद्धको साक्षी त्रिवेणी धाम,देवघाट तथा अन्नपुर्ण क्षेत्र लगायतका थुप्रै हिन्दू आस्थाका केन्द्रहरु यस यात्रामा महत्वपुर्ण स्थानको रुपमा तय गरिएका छन् ।

यस यात्रामा नेपालका फरक फरक १७ वटा स्थानमा विभिन्न १७ वटा धार्मिक कार्यक्रम सञ्चालन गर्नेछ । परापुर्वकालदेखि थालनी गरिएको यस यात्राको आफ्नै महत्व छ । हरिहरनाथ मुक्तिनाथ यात्रा भारतको सोनपुरबाट मुक्तिनाथसम्म नारायणीको संगमबाट उद्गमसम्मको देव तिर्थयात्रा हो ।

यसको चर्चा १८ महापुराणहरुमध्ये ५ वटामा पाईन्छ । हरिहरक्षेत्र धर्म दृष्टिबाट मान्य ७ तिर्थ क्षेत्रहरुमध्ये एक मुक्तिक्षेत्र १०८ दिव्य क्षेत्रहरुमध्ये प्रमुख हो । हिन्दू धर्मको मान्य परम्परा अनुसार चारधामको पुर्णता पनि यस यात्रा पश्चात नै सार्थक हुने मान्यता छ । परापुर्वकालदेखि नै चैत शुक्ल एकादशी तिथिको अवसरमा आरम्भ गरिने यो रथयात्रा यस वर्ष पनि चैत शुक्ल एकादशी तिथिको अवसर पारेर सुरु गरिएको हो ।