मुख्यमन्त्रीको वेभसाईटमा किन राखियो "मधेस प्रदेश"

न्यूज ब्यूरो ||
जनकपुरधाम, २१ चैत्त ।
प्रदेश २ को नाम के राख्ने भन्ने विषयमा अहिले पार्टीहरूले आन्तरिक रूपमा बहस चलाइरहेका छन् ।

प्रदेशको नमकरणको विषय संसदमा समेत प्रस्ताव टेबल भएको छैन । विभिन्न दलले आआफ्नो पक्षबाट विभिन्न नामहरू बहसमा भने ल्याइरहेका छन् । यही क्रममा मुख्यमन्त्री लालबाबु राउतको सचिवालयले ’मन्त्रिपरिषद्का योजना र कार्यक्रमका बारेमा जानकारी दिने उद्देश्यले’ भन्दै सोमबार वेबसाइट सार्वजनिक ग¥यो ।

उक्त वेवसाइटमा प्रदेशको नाम ’मधेस प्रदेश’ राखिएको छ । प्रदेशको नाम संसदमा टेबल हुन नसकेको अवस्थामा मुख्यमन्त्रीको कार्यालयले सार्वजनिक गरेको वेबसाइटमा यसरी मधेस प्रदेश नाम राखिनुलाई प्रदेश २ का राजनीतिक दलले आआफ्नै तरिकाले विश्लेषण गर्न सुरु गरेका छन् ।

प्रदेश २ को नामका विषयमा मधेसवादी दल संघीय समाजवादी फोरम नेपाल र राष्ट्रिय जनता पार्टी नेपालले मधेस प्रदेश राख्नुपर्ने धारणा राख्दै आएका छन् भने अन्य दलहरूले मिथिला भोजपुरा मधेस प्रदेश, मध्य मधेस प्रदेशलगायतका नाम राख्नुपर्ने माग गर्दै आएका छन् । तर मुख्यमन्त्रीको कार्यालयको वेवसाइटमा नै मधेस प्रदेश राखिएको छ ।

प्रदेश २ मा फोरम र राजपाको सरकार छ । मुख्यमन्त्री राउत फोरमबाट मुख्यमन्त्री बनेका हुन्। ‘कार्यव्यवस्था परामर्श समितिमा छलफलमा नै नभई उहाँले यसरी आफ्नै ढंगबाट नाम राख्नु ठीक होइन । उनले जबर्जस्ती प्रदेशको नाम मधेस प्रदेश राख्न खोजेको टिप्पणी सुरु भएको छ । संसदमा टेबल नै नभई यसरी प्रदेशको नाम राख्दै प्रदेश २ का मुख्यमन्त्रीको वेबसाइटमा “मधेस प्रदेश” वेवसाइट बनाइनु राम्रो नभएको प्रदेश २ का कांग्रेस संसदीय दलका नेता रामसरोज यादव बताउँछन्।

भन्छन, ‘कार्यव्यवस्था परामर्श समितिमा छलफलमा नै नभई उनँले यसरी आफ्नै ढंगबाट नाम राख्नु ठीक होइन ।’ अहिले तत्काल यो निर्णय गर्नु गलत भएको उनको भनाइ छ । भन्छन, ‘उहाँ मधेसवादी दलको मात्र मुख्यमन्त्री होइन होला । समग्र प्रदेशकै मुख्यमन्त्री होला त्यो हिसाबले छलफल नै नगरी यसरी नाम राख्नु हुने थिएन । कम्तीमा उहाँले राजनीतिक दलसँग त छलफल गर्नुपर्थ्यो नि!’ मधेस प्रदेश राख्न कुनै पनि हालतमा ठीक नभएको उनी बताउँछन् । उनी भन्छन, ‘नेपालमा मधेसका जिल्ला २२ वटा छन् ।

प्रदेश २ मा आठवटा जिल्ला छन् अनि कसरी मधेस प्रदेश हुन्छ ? उहाँहरूको तर्क नै ठीक छैन।’ तर राजपाकी सांसद तथा कार्यव्यवस्था परामर्श समितिकी सदस्य सुरिता साहले भने मधेस प्रदेश राखिनु राम्रो भएको प्रतिक्रिया दिइन् ।

उनले भनिन, ‘यो प्रदेशको नाम पहिचानका आधारमा मधेस नै हुनुपर्ने हो। छलफल त भएको छैन । उहाँले राख्नुभएछ । ठीकै गर्नुभयो। यदि पछि सहमति भएन भने परिवर्तन गर्न मिल्छ ।’ उहाँ नचाहिने काममा लाग्नुभएको छ ।

उहाँ उद्दघाटन र शिलान्यासमा मात्र लाग्नुभयो । अहिलेसम्म केही विधेयक पनि ल्याउनु भएन । यता, माओवादी केन्द्रका संसदीय दलका नेता रामचन्द्र मण्डलले मुख्यमन्त्रीले आफ्नो हितको मात्र काम गर्न थालेको बताए ।

उनले औपचारिक छलफलमा नामकरणको विषय नआएको अवस्थामा यसरी राखिनु गलत भएको बताए । उनले भने, ‘उहाँ नचाहिने काममा लाग्नुभएको छ । उहाँ उद्दघाटन र शिलान्यासमा मात्र लाग्नुभयो ।

अहिले सम्म केही विधेयक पनि ल्याउनुभएन ’ मुख्यमन्त्री राउतको सचिवालयले भने आफूहरूले जानेर मधेस प्रदेश नराखेको प्रतिक्रिया दिएको छ। मुख्यमन्त्री राउतका प्रेस सल्लाहकार आतिस मिश्रले प्राविधिक त्रुटि भएको बताए । उनले भने, ‘त्यस्तो नहुनुपर्ने हो । त्यस्तो छ । हामी यसलाई सच्याउन लगाउँछौँ ।’

प्रदेश २ का मुख्यमन्त्री राउतले सोमबार मुख्यमन्त्रीको प्रत्येक दिनको कार्यक्रम, विभिन्न मन्त्रीहरूका कार्ययोजना सर्वसाधारणहरूले सहज रूपमा जान्न पाऊन् भन्ने उद्देश्यका साथ वेवसाइट सार्वजनिक गरिएका थिए ।

वेवसाइटबाट राजनीतिक दल, सर्वसाधारण, पत्रकार लगायतका व्यक्तिहरूसँग भेटघाट तथा सल्लाह सुझावका लागि सहज हुने बताइएको थियो । उनले उक्त वेवसाइटमा सुझाव दिन सबैलाई आग्रह समेत गरेका थिए ।

समाचार : आजको न्यूजपेपर दैनिक पत्रिकाबाट