धनुषाको कमला नगरपालिकामा त्रिपक्षीय भिडन्त, को कति बलियो ?

न्यूज ब्यूरो, जनकपुरधाम । पूर्वी धनुषाको कमला नगरपालिकामा यसपालीको चुनावमा त्रिपक्षीय भिडन्त हुने भएको छ ।

गत चुनावमा ५ बर्षसम्म नेपाली काँग्रेसको स्थानीय सरकार रहेको नगरपालिकामा यसपाली जनता समाजवादी पार्टी (जसपा) र नेकपा (समाजवादी) बीच त्रिपक्षीय भिडन्तको सम्भावना देखिएको छ ।

कमला नगरपालिकामा यी तीन दल बलिया देखिन्छन् । नेपाली काँग्रेसको गढ मानिएको कमला नगरपालिकामा यसपाली जसपा र नेकपा समाजवादीले पनि चुनौति दिने भएको छ ।

गत चुनावमा पराजित भएको जसपा यसपाली भने टक्कर दिने मुडमा देखिएको छ । गत चुनावमा पूर्व स्थानीय विकासमन्त्री रामचन्द्र झाको आशिर्वादले तत्कालिन संघीय समाजवादी फोरम (मशाल छाप) बाट चुनाव जितेका वर्तमान जसपाका उम्मेदवारमा तनाव भएको छ ।

रामचन्द्र झाकै आशिर्वादले चुनाव जितेका उम्मेदवारहरुले यसपाली रामचन्द्र झा हात हटाएपछि पैसाको खोलो नै बगाउन थालेका छन् । कमला नगरपालिकाको केही वडाहरुको केही वस्तीहरु बिकाउ वस्तीको रुपमा चिन्छिन् ।

कमला नगरपालिका अन्तर्गतको केही वस्तीहरु यस्तो छन् जहाँ बिना पैसाको भोँट दिदैनन् । उनीहरु धर्म, धन, ईमान सबै बेचेर केही रकमको लोभमा भोँट बेच्ने गरेका छन् ।

नगरपालिकाको वडा नं. १ को मँगराहाको महरा वस्ती, वडा नं. २ को तेलियाहा, सुन्दरपुर र सराबे टोलका अधिकाँश मतदाता बिकाउ मतदाताको रुपमा चिन्छिन् । पैसा लिएर मात्र भोँट दिने उनीहरुको ५ बर्षे योजना हुन्छन् ।

यस्तै, वडा नं. ५ को पासवान वस्ती, वडा नं. ६ को अधिकाँश दलित वस्ती बिकाउ वस्तीको रुपमा चिन्छिन् । बाँकीका वडाहरुमा भने यस्तो प्रवृति देखिदैनन भने यसको प्रतिकार पनि गर्ने गरेको देखिएका छन् ।

कमला नगरपालिकामा को कति बलियो ?

१. बिशेश्वर यादव (गाछी छाप): नेपाली काँग्रेसको गढ मानिएको कमला नगरपालिकामा विशेश्वर यादवको सँगठनको हिसाबले बलियो पक्कड मानिन्छ । नेपाली काँग्रेसको सँगठन नगरपालिकाको ९ वटै वडामा बलियो छ । गत चुनावमा पनि सँगठन बलियो भएकै कारण राम उदगार गोईत नेपाली काँग्रेसबाट मेयर पदमा विजयी भएका थिए । विशेश्वर यादवको वडा नं. ५, ६,७ र ८ मा मोटो सँगठन छ । यस्तै वडा नं. १ मा काँग्रेसको सँगठन कमजोर रहेको छ भने वडा नं. २ मा बलियो सँगठन रहेको छ । वडा नं. ३ मा काँग्रेसकै सँगठन बलियो रहेको छ भने वडा नं. ४ मा नेकपा समाजवादी (रामचन्द्र झा) र नेपाली काँग्रेसको बराबरको सँगठन रहेको छ । वडा नं.९ मा पनि नेपाली काँग्रेस नै बलियो रहेको छ । वडा नं. १ मा जसपा र माओवादी केन्द्रको सँगठन बलियो छ ।

२. पशुपति यादव (छाता छाप): जनता समाजवादी पार्टी (जसपा) नेपाल कमला नगरपालिकाको केही वडामा विस्तार हुँदै गएको छ । कमला नगरपालिका वडा नं. १ मा बलियो रहेको जसपा वडा नं. २ मा रामचन्द्र झाले हात हटाएपछि केही धक्का महसुस गरिएको छ । यद्यपी, वडा नम्बर २ मा पनि जसपाको बलियो सँगठन छ । वडा नं. २ मा जसपाको सँगठनलाई रामचन्द्र झाले मात दिने भएको छ । बिजुलिया, तेलियाहा र सुन्दरपुरमा समाजवादी अर्थात कलम छापको पक्कड छ । जसपा तीन वस्तीमा कमजोर मानिन्छ । वडा नं. ३ मा जसपालाई काँग्रेस र नेकपा समाजवादीले ठक्कर दिने भएको छ । वडा नं. ४ मा जसपाको सँगठन सबभन्दा कमजोर मानिन्छ । वडा नं. ५ मा भर्खर जन्मेको जसपा वडा नं. ६ मा पनि सोही हालातमा रहेको छ । वडा नं. ८ मा मत गुमाउँदै गएको जसपाको वडा नं. ७ मा सँगठन अति कमजोर छ ।

३. कुलदेव मोरबैता (कलम छाप): रामचन्द्र झाको आशिर्वादले चुनाव लडेका कुलदेव मोरबैता बलियो उम्मेदवारको रुपमा उभिएका छन् । कमला नगरपालिकाको विभिन्न वडामा रामचन्द्र झाको व्यक्तिगत पक्कड बलियो छ । सो अनुसार, नेकपा (समाजवादी) पार्टी) कलम छाप वडा नं. २, ३ मा आधी आधी भएपनि वडा नं. ४ मा सबभन्दा बलियो मानिएको छ । वडा नं. ५ मा लडेका शिवा पासवानले पनि जातीगत भोँट असुल्ने भएको छ । सो अनुसार, समाजवादी वडा नं. ५ मा पनि बलियो नै देखिएको छ । वडाध्यक्षमा लडेका शिवा पासवानलाई भोँट नदिएपनि मेयरको लागि कुलदेव मोरवैतालाई भोँट फ्लो हुने सँकेत देखिएको छ । वडा नं. ६,७ र ८ मा समाजवादी पार्टीको सँगठन कमजोर छ । सो वडाहरुमा नेपाली काँग्रेस बलियो छन् ।

वडास्तरीय समिकरणः

वडा नं. १ः वडा नं. १ मा नेकपा माओवादी केन्द्र र जसपाबीच प्रतिष्पर्धा हुने सँकेत देखिएको छ । माओवादीबाट सर्वदेव यादव उम्मेदवारी दिएका छन् भने जसपाबाट निवर्तमान वडाध्यक्ष राजकुमार यादवले उम्मेदवारी दिएका छन् । राजकुमार यादव र सर्वदेव यादवबीच प्रतिष्पर्धा हुने देखिएको छ । वडा नं. १ मा अझै जसपाबाट राजकुमार यादवको पल्ला भारी रहेको छ ।

वडा नं. २ः कमला नगरपालिकाको वडा नं. २ मा त्रिपक्षीय प्रतिष्पर्धा हुने भएको छ । नेपाली काँग्रेसबाट ठकु (ठकाई) यादव सँगाठनिक दृष्टिकोणले अब्बल उम्मेदवार मानिन्छ भने निवर्तमान वडाध्यक्ष एवम् जसपाबाट वडाध्यक्षका उम्मेदवार धनेश्वर यादवको पनि पक्कड बलियो छ । विभिन्न वस्तीमा जसपाको सँगठन तगडा मानिन्छ । केही वस्तीमा लोसपाले जसपाको मत काटेपनि अन्य वस्तीहरुमा भने जसपा बलियो छ । सोही क्रममा रामचन्द्र झाको पक्षबाट वडाध्यक्षमा उम्मेदवारी दिएका बद्री यादव बेदाग व्यक्तित्वको रुपमा उम्मेदवारी दिएका छन् । बद्री यादवले इमान्दारिताको भोँट असुल्ने प्रबल दाबेदार मानिन्छन् । जनमत पार्टीबाट वडाध्यक्षमा उम्मेदवारी दिएका सुनिल कुमार महतोसँग जातीय भोँटसहित केही सँगठनिक भोँट रहेको छ । प्रथम पटक चुनावी माहौलमा आएको हरन छाप (जनमत पार्टी) ले अन्य उम्मेदवारको लागि तनाव सृजना गर्ने अवस्था देखिएको छ । वडा नं. २ मा ठकु यादव, धनेश्वर यादव र बद्री यादवबीच कडा प्रतिष्पर्धा हुने माहौल देखिएको छ ।

वडा नं. ३ः कमला नपाको वडा नं. ३ मा पुनः जसपाबाट विशेश्वर यादव उम्मेदवारी दिएका छन् । यसपाली काँग्रेसबाट रामपृत बनरैत र कलम छापबाट सीतादेवी ठाकुरले उम्मेदवारी दिएका छन् । वडा नं. ३ को समिकरणमा लगमा र मानपट्टिमा जसपाको सँगठन कमजोर परेको छ । पर्सामा जसपा र काँग्रेसको सँगठन बराबरीमा छ । वडा नं. ३ मा पनि त्रिपक्षीय भिडन्तको बीचमा जनमत पार्टीले बाजी मार्ने सँकेत देखिएको छ । जनमतको ईन्ट्रीले बाँकीको तीन दललाई तनाव भएको छ ।

वडा नं. ४ः वडा नं. ४ मा रामचन्द्र झाको कलम छाप र रुख (गाछी छाप) बाहेक अन्य पार्टीको सँगठन नगण्य झै रहेको छ । कमलाबाट निवर्तमान पल्टु कवारी उम्मेदवारी दिएका छन् भने काँग्रेसबाट दिपक गोहिबार र जसपाबाट रानेश मुखियाले उम्मेदवारी दिएका छन् । जनमतबाट शम्भु कुमार महराले उम्मेदवारी दिएका छन् ।

वडा नं. ५ः वडा नं. ५ मा मेयर पदका उम्मेदवार विशेश्वर यादवको पक्कड बलियो छ । हुनतः शिवा पासवानको पक्कड जातीय हिसाबले बलियो मानिएपनि पाँच बर्षको अन्तरालमा उनले विकास भन्दा विनाश मात्रै गरेपछि जनताले पत्याउने तुक देखिैनन् । जसपाको भर्खर जन्म भएको छ वडा नं. ५ मा । नेपाली काँग्रेसबाट फुट भएर जसपा जन्मेको हो । काँग्रेसबाट विशेश्वर यादवका भाई चन्देश्वर यादवले उम्मेदवारी दिएका छन् । जनमतबाट उम्मेदवारी दिएका रामसागर पासवानले पनि भोँट काट्ने भएको छ ।

वडा नं. ६ः वडा नं. ६ बाट नेपाली काँग्रेसका निवर्तमान वडाध्यक्ष मो. समसुल मियाँ मोमिनको पक्कडभन्दा अन्य पार्टीको पक्कड धेरै न्यून छ । उनको वस्तीमा समसुल बाहेक अर्थात गाछी छाप बाहेक अन्य छापमा भोँट हाल्ने कमै नागरिक छन् । व्यक्तिगत लगानीमा गरेको विकासले वडा नं. ६ मा उनको व्यक्तिगत पक्कड पनि बलियो छ । जसपाबाट बाले महतो कोईरी महतोले उम्मेदवारी दिएका छन् ।

वडा नं. ७ : कमला नगरपालिकाको वडा नं. ७ मा नेपाली काँग्रेस बाहेकको अन्य पार्टीको जनमत कम रहेको छ । निवर्तमान वडाध्यक्ष तपेश्वर यादव, जसपाबाट षडानन्द प्रसाद यादव र जनमतबाट देविन्द्र यादवको उम्मेदवारी रहेको छ । उनीहरुले भोँट काटन् सँकेत बढी छ ।

वडा नं. ८ः कमला नगरपालिकाको वडा नं. ८ मा नेपाली काँग्रेसबाट तृपित भुरेरले उम्मेदवारी दिएका छन । निवर्तमान वडाध्यक्षले पाँच बर्षमा विकास गर्न नसकेको गुनासो सहित जसपाबाट पुनः उम्मेदवारी दिएका राजेश्वर मरिक यादवलाई वडा नं. ८ वासीले नपत्याउने मुडमा छन् । विभिन्न समयमा उनले जनताप्रति गरेको व्यवहारालाई दृष्टिगत गरी उनलाई वडा नं. ८ का नागरिकहरुले पत्याउने मुडमा देखिदैनन् ।

वडा नं. ९ः वडा नं. ९ पनि काँग्रेसकै गढ रहेको छ । यसअघि वडाध्यक्षमा काँग्रेसबाट धर्मनाथ मण्डल विजयी भएका थिए । यसपाली रामराजा मण्डललाई नेपाली काँग्रेसको वडाध्यक्षमा मौका दिईएको छ । जसपाबाट विष्णुदेव वैद्य यादवको उम्मेदवारी रहेको छ । कलम छापबाट रामदेव साह तेली र जनमतबाट रामभजन मण्डलको उम्मेदवारी छ ।