निर्वाचन आचारसंहिता विपरित डिजेमा पार्टीहरुको प्रचार, चर्को साउण्डले स्थानीहरु आजित

न्यूज ब्यूरो, जनकपुरधाम । निर्वाचन आयोगले डिजेमा चर्को साउण्ड बजाउँदै कुनै पनि दलले प्रचार प्रसार गर्न नपाउने नियम लगाएपनि चर्को साउण्डमा डिजे बजाएर प्रचार प्रसार गरिरहेको पाईएको छ ।

धनुषा जिल्लाको कमला नगरपालिकाको वडा नम्बर २ माचि झिटकैयास्थित विभिन्न पार्टीहरुले डिजेमा गीत बजाएर चर्को साउण्डमा प्रचार प्रसार गर्दा स्थानीयहरु आजित भएका छन् ।

एक मात्र दलले नभएर चुनावमा उम्मेदवारी दिएका विभिन्न दलका उम्मेदवारहरुले चर्को साउण्डको डिजेमा गीत बजाएर प्रचार प्रसार गर्न लागेपनि निर्वाचन अधिकृतको कार्यालयले कारवाही गर्न सकेको छैनन् ।

कमला नगरपालिका वडा नम्बर २ मा नेकपा (समाजवादी), जनता समाजवादी पार्टी (जसपा), नेपाली काँग्रेस लगायतका पार्टीहरुले चर्को साउण्डको डिजे बजाएर प्रचार प्रसार गरिरहेको छ ।

कमला नगरपालिकाको निर्वाचन अधिकृत धर्मा अवतार कोईरालाले डिजेमा चर्को साउण्ड बजाएर प्रचार प्रसार गरिरहेको पाईएमा प्रथम पटक चेतावनी दिने, पुनः चेतावनी दिने तथा पुनः सोही कार्य दोहरयाएपछि उम्मेदवारी रद्द गर्न सक्ने चेतावनी दिए ।

स्थानीय प्रशासनले समेत आम नागरिकलाई दिक्कत नहुने गरी मात्र प्रचार प्रसार गर्न भन्दै डिजे, एण्डकोमा प्रचार प्रसार गरेमा कारवाही हुने चेतावनी दिसकेको छ ।

यता, ईलाका प्रहरी कार्यालय खजुरीका प्रहरी नीरिक्षक (ईन्सपेक्टर) निरञ्जन घिमिरेले अरुलाई दिक्कत हुने गरी चर्को साउण्डमा डिजे बजाएर प्रचार प्रसार गरे डिजेको मेसिन खोसिनुको साथै निर्वाचन कार्यालयमा उजुरी समेत गरिने चेतावनी दिए ।