सार्वजनिक स्थानबाट चुनावी पर्चा पम्पलेट हटाउँदै खजुरी प्रहरी

न्यूज ब्यूरो, जनकपुरधाम । धनुषाको ईलाका प्रहरी कार्यालय खजुरीले विभिन्न सार्वजनिक र सरकारी स्थानमा राखिएको चुनावी प्रचार प्रसारको समाग्रीहरु हटाउन थालेका छन् ।

निर्वाचन आयोगद्धारा जारी गरिएको निर्वाचन आचार संहिता पालना गराउनको लागि कुनै पनि सार्वजनिक स्थानमा झुण्डयाइएको पोष्टर, पर्चा, पम्पलेटहरु हटाउन थालेका छन् ।

ईलाका प्रहरी कार्यालय खजुरी मातहतको प्रहरी चौकी माचि झिटकैयाका प्रहरी हबल्दार नन्दकिशोर गिरीको कमाण्डमा गएको प्रहरी टोलीले माचि झिटकैया, सराबे, लगमा लगायतको स्थानबाट आचारसंहिता विपरितको चुनावी प्रचार समाग्री हटाएको हो ।

म्यादी प्रहरीको सहयोगमा बिजुलीको पोल, मठ मन्दिर, सार्वजनिक दलान, सार्वजनिक स्थल, सरकारी स्थलमा नियम मिचेर लगाएको प्रचार प्रसार समाग्री हटाउन सुरु गरेको हो ।

कमला नगरपालिकाका निर्वाचन अधिकृत धर्मा अवतार कोईलाको विशेष निर्देशनमा ईलाका प्रहरी कार्यालय खजुरीका प्रहरी ईन्सपेक्टर निरञ्जन घिमिरेले निर्वाचन समाग्री हटाउन सुरु गरेका हुन् ।

ईन्सपेक्टर घिमिरेले निर्वाचन आयोगले वर्जित गरेको स्थानमा आचारसंहिता विपरित कुनै पनि ठाउँमा पर्चा, पम्पलेट, चुनावी प्रचार समाग्री नराख्न आग्रह समेत गरेका छन् ।