यादवलाई मेयरको टिकट नदिएपछि जनकपुरमा जसपाको कार्यालय घेराउ

न्यूज ब्यूरो, जनकपुरधाम । धनुषाको धनुषाधाम नगरपालिकाको लागि जनता समाजवादी पार्टी (जसपा) नेपालले मेयरको लागि एक कार्यकर्ताको नाम हटाएपछि कार्यालय घेराउ गरिएको छ ।

जसपाले विभिन्न नगरपालिकामा टिकटको लागि गरिएको नाम सिफारिसमा धनुषाधाम नगरपालिकाबाट दुई जनाको नाम राखेपनि मेयरको टिकटको लागि धाएका सँजीव कुमार यादवको नाम हटाएपछि कार्यालय घेराउ गरिएको छ ।

धनुषाधाम नगरपालिका वडा नम्बर ९ बाट तत्कालिन वडाध्यक्ष रहेका सँजीव कुमार यादवले धनुषाधामको मेयरको लागि पार्टी कार्यालय दौडेपनि उनलाई टिकट नदिएपछि उनका समर्थकहरुले पार्टी कार्यालय घेराउ गरेको हो ।

संजीवको नाम हटाएर नगरसमिति बैठकले सिफारिस गरेका नामहरू विनोद भर्खेर (यादव) र ज्ञानकुमार यादवको नाम मात्र समावेश गरिएको विरोधमा यादवका समर्थकले नाराबाजी गर्दै पार्टी कार्यालय घेराउ गरेका छन् ।

धनुषाधाम नगरपालिकाको नगरसमिति बैठकबाट विनोद भर्खेर, ज्ञानकुमार यादव र संजीव यादवको नाम सिफारिस भएको थियो ।

तर, जिल्ला समन्वय समिति धनुषाले मधेस प्रदेश समितिमा सिफारिस गरेका नामहरूमध्येबाट मनोमानी तरिकाले संजीवको नाम हटाएपछि विरोधमा समर्थकले नाराबाजी गरेका हुन् ।