जहाँ जहाँ महन्थ ठाकुर, तहाँ तहाँ 'सँजय कुमार साह'

न्यूज ब्यूरो, जनकपुरधाम । नेपालको दिग्गज नेताहरुमध्ये महन्थ ठाकुर एक हुन् । कुनै बेला प्रधानमन्त्री, राष्ट्रपतिको पद समेत ठुकराएका ठाकुरको राजनीतिक हैसियत उच्च मानिन्छ ।

राजनीति उचार चढावकोबीच महन्थ ठाकुरसँगै रहेका कैयौँ नेता कार्यकर्ताहरुले अवसर पाएपछि अन्य पार्टीमा गए, तर धनुषाको नेता सँजय कुमार साह भने जहिले पनि महन्थ ठाकुरसँगै बस्ने निधो गरेका छन् ।

धनुषाको विदेह नगरपालिका वडा नम्बर १ ठाढी बस्ने नेता सँजय साह महन्थ ठाकुरको अति नजिकको नेता मानिन्छ । महन्ठ ठाकुरसँगै राजनीति सुरुवात गरेका नेता साहले ठाकुरको साथ कहिल्यै छाडेनन् ।

महन्थ ठाकुरसँगै दर्जन बढी नेता कार्यकर्ताहरु अवसर पाएपछि भागेको इतिहास छ । सँजय कुमार साहले जस्तो सुकै अवस्थामा पनि ठाकुरसँगै बस्ने वाचा गर्छन् ।

धनुषा जिल्लाको निर्वाचन क्षेत्र नम्बर २ चर्चामा समेत रहँदै आएका नेता साह महन्थ ठाकुरले गठन गरेको तत्कालिन तराई मधेश लोकतान्त्रिक पार्टी (तमलोपा) मा सुरुदेखि नै लागेका हुन् ।

वि.सं. २०६४ सालमा तमलोपा दर्ता गरेपछि नेता साह महन्थ ठाकुरसँग बसेको बताउँदै पार्टी दर्ता भएको दिनदेखि नै जिल्ला सदस्यको रुपमा काम गरे ।

त्यसपछि उनको कार्य मूल्याँकनलाई हेर्दै ठाकुरले उनलाई पार्टीको तर्फबाट प्रचार प्रसार समितिको जिल्ला सँयोजकको जिम्मेवारी सुम्पेको थियो । प्रचार समितिको सँयोजक भएर उनले कार्य गर्दा उनको कार्यलाई मूल्याँकन गर्दै पुनः उनलाई केन्द्रीय सदस्य बनाए ।

तमलोपासहित अन्य ६ दल मिलेर राष्ट्रिय जनता पार्टी (राजपा) बनेपछि पनि सँजय साहलाई केन्द्रीय सदस्य सहित पार्टीको सहकारी विभागको प्रमुखको जिम्मेवारी दिइयो ।

राजपामा सहकारी विभागको प्रमुखको रुपमा कार्य गरेपछि उनी त्यही रोकिएनन् । राजनीतिमा छोटो समयमै फडको हानेका नेता साहलाई राजपा संघीय समाजवादी फोरमसँग मिलेर बनेको जनता समाजवादी पाटी (जसपा) मा समेत केन्द्रीय सदस्य पदमा मनोयन हुन सफल भए ।

जनता समाजवादी पार्टीमा समेत उनलाई केन्द्रीय सदस्य सहित सहकारी विभागको प्रमुखको रुपमा काम गर्ने जिम्मेवारी दिइएको थियो । महन्थ ठाकुरको विश्वासिलो पात्र रहेको नेता सँजय साहले कहिल्यै पनि महन्ठ ठाकुरको साथ छाडेनन् ।

पुनः जसपामा फुट भएपछि बनेको लोकतान्त्रिक समाजवादी पार्टी (लोसपा) मा समेत साहलाई सहकारी विभागको प्रमुखको जिम्मेवारी सम्हाल्दै आएका छन् ।

पार्टीप्रति लगाव र वफादार मानिएको नेता साहले धनुषा निर्वाचन क्षेत्र नम्बर २ को लागि चर्चित नेताहरुमध्ये एक मानिन्छन् ।

न्यूज ब्यूरोसँगको कुराकानीमा नेता साहले क्षेत्रमा देखिएको बेतिथिलाई न्यूनिकरणा गर्नको लागि नयाँ अनुहारको जनताहरुले खोजी गरिरहेको बेला आफू उम्मेदवारी दिने बताए ।

पार्टीमा महन्थ ठाकुरसँग रहने विश्वासिलो पात्र मानिएको तथा मधेश आन्दोलनमा अग्रणी भूमिका निर्वाह गरेका नेता सँजय कुमार साहको ईमान्दारितको कदर गर्दै नेता ठाकुरले पनि आफूसँगै राख्दै आएका छन् ।