श्रोत नखुलेको ११ लाख रुपैयाँ सहित एक जना पक्राउ

न्यूज ब्यूरो, सिरहा । रकमको श्रोत नखुलेको ११ लाख भन्दा बढी रुपैयाँ सहित सिरहामा एक जना पक्राउ परेका छन् ।

शनिबार दिउँसो करिब ३ बजेको समयमा सशस्त्र प्रहरी बल नेपाल नं. २ छिन्नमस्ता बाहिनी मुख्यालय महोत्तरी र सशस्त्र प्रहरी बल नेपाल नं. ७ गण हेड क्वाटर सिरहाबाट खटि गएको टोलीले सो रकम सहित एक व्यक्तिलाई पक्राउ गरेको हो ।

विशेष सूचनाको आधारमा खटि गएको सशस्त्र प्रहरीको टोलीले सिरहाको भगवानापुर सीमा ईलाकाबाट पछयाउँदै जाँदा सिरहाको लहान नगरपालिका वडा नम्बर १ मटिअर्वास्थितबाट ११ लाख ३ हजार ५० रुपैयाँ सहित भगवानपुर गाउँपालिका वडा ४ जमुवाटोल बस्ने तनुकलाल दिलिप कुमार साहलाई पक्राउ गरेको हो ।

उनको साथबाट १००० को नोट ८०३ वटा, ५०० को नोट ४०० वटा, १०० को नोट १९९ वटा र ५० को नोट ३ वटा गरि जम्मा रु ११ लाख ३ हजार ५० रुपैयाँसहित पक्राउ गरेको सशस्त्र प्रहरी ७ नम्बर गण सिरहाका प्रमुख एसपी रमेश थापाले जानकारी दिए ।

उनको साथबाट एक मोबाईल सेट र उनको नागरिकता बरामद गरि नियन्त्रणमा लिई आवश्यक अनुसन्धान एवम् कारवाहीको लागि जिल्ला भन्सार कार्यालय माडरमा बुझाएको हो ।