नेविसंघ मधेश प्रदेशमा गोईत बलिया उम्मेदवार

न्यूज ब्यूरो, जनकपुरधाम । नेपाली कांग्रेसले रिक्त रहेका भातृसंस्थामा तदर्थ समिति बनाउने तयारी गरेसँगै नेविसंघको मधेश प्रदेशको अध्यक्ष पदमा ईन्द्रजीत गोईत बलिया उम्मेदवारको रुपमा उम्मेदवारी दिने भएको छ ।

केही दिन अघि बसेको केन्द्रीय कार्यसम्पादन समितिको बैठकले नेपाल विद्यार्थी संघ, नेपाल तरुण दल, नेपाल महिला संघ लगायतका १० भ्रातृ संस्थाको तदर्थ समिति फागुन मसान्तभित्र बनाउने निर्णय भएपछि उनी उम्मेदवारी दिने आकाँक्षासहित उनको पक्कड बलियो मानिएको छ ।

नेविसंघमा मधेश प्रदेश समितिमा निरन्तर चर्चामा रहँदै आएका गोईतले यसपाली अध्यक्षको लागि आफ्नो उम्मेदवारी दर्ज गराउने न्यूज ब्यूरोसँग भने ।

नेविसंघ मधेश प्रदेशको सिटिईभिटीमा निरन्तर विद्यार्थीहरुको लागि विभिन्न समयमा आवाज उठाउँदै आएका गोईतले मधेश प्रदेश समितिको अध्यक्ष पदको लागि दाबी गर्ने भएको छ ।

तदर्थ, समितिलाई महाधिवेशन गर्ने जिम्मेवारी हुनेछ । तदर्थ समिति गठन गर्ने जिम्मा सभापति शेरबहादुर देउवाले पदाधिकारीहरुलाई दिएका छन्।

नयाँ बन्ने समितिले तीनै तहको निर्वाचन सम्पन्न भएको मितिले ३ महिनाभित्र महाधिवेशन गराउनुपर्ने म्याण्डेट दिइनेछ ।

गत फागुन ३ गते कांग्रेसले म्याद सकिएका १० भ्रातृ संस्थाको केन्द्रीय समिति भंग गर्ने निर्णय गरेको थियो । जसमध्ये नेपाल विद्यार्थी संघ, नेपाल तरुण दल, नेपाल महिला संघ मुख्य रहेका छन् ।

त्यस्तै नेपाल प्रजातन्त्र सेनानी संघ, नेपाल किसान संघ, नेपाल आदिवासी जनजाति संघ, राष्ट्रिय लोकतान्त्रिक अपाङ्ग संघ, नेपाल तामाङ संघ, नेपाल ठाकुर समाज र नेपाल भूतपूर्व सैनिक संघ रहेका छन् ।

कांग्रेसले नेविसंघ र तरुण दलको तदर्थ समिति गठनमै उमेर हद लगाउँदैछ । निर्णयमै प्रष्ट उल्लेख भएका कारण अब नेविसंघमा ३२ वर्षे र तरुण दलमा ४५ वर्षे उमेर हद लागु हुने स्पष्ट छ ।

नेविसंघ र तरुण दलमा नेतृत्व लिन नेताहरुको दौडधुप सुरु भइसकेको छ । उमेर हद लागेको अवस्थमा नेविसंघमा नेतृत्वका लागि धनुषाका ईन्द्रजीत गोईतको चर्चा प्रदेश अध्यक्षको लागि चर्चामा छ भने उनले केन्द्रीय सदस्यमा पनि उम्मेदवारी दिने बताएका छन् ।