मेयर उपर अधिकृत भारीः सरुवा भएका अधिकृतलाई सोही नपामा काम गर्न सर्वोच्चको अन्तरिम आदेश

न्यूज ब्यूरो, जनकपुरधाम । मधेश प्रदेशको धनुषा जिल्लास्थित रहेको हँसपुर नगरपालिकाको नगर प्रमुखमाथि कार्यालय प्रमुख भारी देखिएका छन् ।

सुरुदेखि नै नगर प्रमुख रामज्ञान मण्डल र कार्यालय प्रमुख केशव अधिकारीबीच चल्दै आएको टसल लामो समयसम्म समेत रोकिएको छैनन् ।

सोही क्रममा नगरपालिकाबाट सरुवा भएका प्रशासकीय अधिकृतलाई सोही नगरपालिकामा कामकाज गर्न सर्वोच्च अदालतले अन्तरिम आदेश दिएको छ ।

सर्वोच्च अदालतले प्रमुख प्रशासकीय अधिकृत केशव कुमार अधिकारीलाई हंसपुरमै कामकाज गर्न अन्तरिम आदेश दिएको हो ।

संघीय मामिला तथा सामान्य प्रशासन मन्त्रालयले सरुवा गरेपछि सर्वोच्च अदालतमा प्रशाकीय अधिकृत अधिकारीले मन्त्रालय, नगरपालिका र प्रदेश सरकारलाई विपक्षी बनाएर दिएको रिटमा आइतबार सर्वोच्चले अधिकृतलाई सोही नगरपालिकामा काम गर्न दिन आदेश दिएको हो ।

सर्वोच्च अदालतका न्यायाधीश बम कुमार श्रेष्ठको एकल इजलासले कर्मचारी समायोजन ऐन २०७५ को दफा ९(९) बमोजिम प्रदेश वा स्थानीय तहले माग गरेको अवस्था नरहेको र निवेदक हंसपुर नगरपालिकाको प्रशासकीय अधिकृत भई स्थानीय सरकार सञ्चालन ऐन २०७४ को दफा ८४ (३) र (४)ले नेपाल सरकारले खटाएको अवस्था समेत भएकोबाट निवेदकलाई हाल कार्यरत रही आएको हंसपुर नगरपालिका धनुषामा नै प्रमुख प्रशासकीय अधिकृतको पदभारमा रही कामकाज गर्न दिन विपक्षीहरुको नाममा सर्वोच्च अदालत नियमावली २०७४ को नियम ४९ (२) बमोजिम अन्तरिम आदेश जारी गरेको हो ।

अधिकृत अधिकारी र मेयर मण्डलबीच सुरुदेखि ने मतभेद रहँदै आएकोमा राजनीतिक दलको हिसाबले समेत अधिकृतलाई मेयरले राख्न चाहिरहेका छैनन् ।

अधिकृत अधिकारी जनता समाजवादी पार्टी (जसपा) पार्टी नजिक मानिएका छन् भने मेयर लोकतान्त्रिक समाजवादी पार्टी (लोसपा) का रहेका छन् । सोही कारणले पनि दुवै जनाबीच सुरुदेखि नै टसल हुँदै आएको छ ।

मेयरले बारम्बार उनलाई हटाउने प्रयास गरेपनि अधिकृत अधिकारीले अदालतको आदेश लिएर सोही नगरपालिकामा काम गर्ने अडान लिएका छन् । हाजिर हुन समेत उनले अदालतको आदेश लिएर नगरपालिका छिरेका थिए ।

अदालतले यसअघि पनि अधिकारीलाई कामकाज गर्नबाट नरोक्न आदेश जारी गरेको थियो भने पुनः कामकाजको वातावरण नबनाउँदा सर्वोच्च गुहारेका अधिकृत अधिकारीले सर्वोच्चबाट सोही नगरपालिकामा काम गर्ने अन्तरिम आदेश पाएको हो ।