सिरहाः  Facebook बाट लभ परेपछि विवाह, दोस्रो विवाह गर्न हत्या !

न्यूज ब्यूरो, सिरहा । मधेश प्रदेशको सिरहा जिल्लास्थित एक युवकले दोस्रो विवाह गर्न आफ्नो श्रीमतिको ह त्या गरेको आरोपमा पक्राउ परेका छन् ।

दोस्रो विवाह गर्नका लागि पहिलो श्रीमतीको ह त्या गरेको आरोपमा सिरहा प्रहरीले अर्को एक युवकलाई पक्राउ गरेको छ ।

पक्राउ पर्नेमा जिल्लाको कर्जन्हा नगरपालिका वडा नम्बर–७ बस्ने २३ वर्षीय अमर राउत रहेका छन् ।

राउतले परिवारजनलाई जानकारी नदिई अर्को विवाह गर्नका लागि आफ्नो पहिलो श्रीमती २२ वर्षीया पूजा सिंह भन्ने पूजाकुमारी पोदारको ह त्या गरेको जिल्ला प्रहरी कार्यालय सिरहाका प्रवक्ता प्रहरी नायव उपरीक्षक सुभाष बुढाथोकीले जानकारी दिए ।

गत मंगलबार जिल्लाको कर्जन्हा नगरपालिका वडा नम्बर ७ स्थित कमला नदी किनारको काँसघारीमा पूजाको शव फेला परेको प्रहरीले जनाएको छ । अमरलाई घटनाको अनुसन्धानका क्रममा शुक्रबार पक्राउ गरिएको डिएसपी बुढाथोकीले बताए ।

अमर वैदेशिक रोजगारीका क्रममा कतारमा रहेका बेला पूजासँग प्रेममा परेका थिए । फेसबुकमा चिनजान भई एक वर्षदेखि नियमित सम्पर्कमा रहेका अमरले माघ १३ गते नेपाल फर्केपछि माघ २७ गते काठमाडौंको भद्रकाली मन्दिरमा विवाह गरेका थिए । विवाह गरेर दुवैजना काठमाडौं बाफलमा छुट्टै कोठा भाडामा लिई बस्दै आएका थिए ।

विवाह गरेर अमरले आफ्नो घरमा कुराकानी गर्दा घरपरिवारले स्वीकार नगरेपछि घरपरिवारलाई मनाउन घर आएका थिए ।

तर, घर आएपछि पुनः नफर्केपछि पूजा फागुन १६ गते अमरलाई खोज्दै सिरहाको बस्तीपुर चोकमा पुगेका थिइन् । सिरहा पुगेकी पूजाले श्रीमानलाई आफू आएको जानकारी गराएपछि अमरले आफू बाहिर रहेकाले साँझमा लिन आउने जानकारी गराए ।

अमरले पूजाले आफूलाई खोज्दै आएपछि आफ्नो साथीहरुसँग सल्लाह गरेर हत्याको योजना बनाई बस्तिपुर चोकमा पुगेर उनलाई घर लैजाने बहानामा कमला नदीको किनारमा लगेर साथीहरुसँग मिलेर घाँटी थिची ह त्या गरेको अनुसन्धानबाट खुलेको डिएसपी बुढाथोकीले बताए ।

फेसबुकमा प्रेममा परेर विवाह गरेका युवकले घर परिवारलाई मनाउन आएकोमा अमरकै सहमतिमा असन्तुष्ट परिवारले धनुषाकी युवतीसँग अर्को विवाह तय गरेका थिए ।

तर, पूजा अचानक आएपछि विवाहमा असर पर्ने देखेर अमरले आफ्नो साथीसँग मिलेर पूजाको ह त्या गरेको जिल्ला प्रहरी कार्यालय सिरहाले जनाएको छ ।

यस घटनामा अमर पक्राउ परे पनि घटनामा संलग्न अन्य व्यक्ति फरार रहेका छन् । फरारहरुको खोजी भइरहेको जिल्ला प्रहरी कार्यालय सिरहाले जनाएको छ ।