जनकपुरमा एक युवकमाथि गोली प्रहार, घाँटीमा अडकियो गोली, काठमान्डौँ रिफर !

न्यूज ब्यूरो, जनकपुरधाम । मधेश प्रदेशको राजधानीस्थित एक युवकमाथि गएराती गोली प्रहार भएको छ । उनको अवस्था चिन्ताजनक रहेको छ ।

जनकपुरधाम उपमहानगरपालिका वडा नम्बर १९ बेँगाशिवपुरस्थित गएराती (शनिबार बेलुकी) करिब ८ः३० बजेको समयमा सोही स्थान बस्ने स्थानीय मुकेश मुखियालाई गोली प्रहार गर्दा अवस्था चिन्ताजनक भएको छ ।

धनुषाको कमला नगरपालिका वडा नम्बर ७ स्थायी घर भएका मुकेश आफ्नो मामा गाउँ बस्दै आएका थिए । त्यहाँस्थित मामा भोगी मुखियाको घरमा बस्दै आएका उनीमाथि राती गोली प्रहार हुँदा गम्भिर घाईते भएको जिल्ला प्रहरी कार्यालय धनुषाका प्रहरी प्रवक्ता जीतेन्द्र कुमार बस्नेतले जानकारी दिए ।

“मुखियाको घाँटीमा गोली लागेको छ। गोली घाँटीमै अड्किएर गम्भीर घाइते भएका उनलाई उपचारका लागि राति नै काठमाडौं पठाइएको छ । उनको अवस्था चिन्ताजनक रहेको छ ।”– डिएसपी बस्नेतले भने ।

मामाको किराना पसलमा शनिबार राति आएका स्थानीयसँग कुराकानी गरिरहेका बेला मुकेशलाई गोली हानिएको प्रहरीले जनाएको छ।

प्रहरीका अनुसार घटनास्थलबाट पेस्तोल बरामद भएको छ भने गोली हान्ने व्यक्ति पनि पहिचान भइसकेको छ तथा उनलाई पक्राउ गर्ने तयारी गरिएको डिएसपी बस्नेतले जनाए ।