प्रदेश सभा बैठक : आर्थिक कार्यविधि च्याप्टर टुँगियो, बुधबार फेरी बस्दै

कुलदीप दास ||
जनकपुरधाम, १३ चैत्त ।
प्रदेश नम्बर २ को सरकारले प्रदेशसभामा प्रस्तुत गरेको आर्थिक कार्यविधि विधेयक माथिको सैद्धान्तिक छलफल मंगलबार टुङ्गिएको छ ।

प्रदेश सरकारको आर्थिक कार्यविधिलाई नियमित तथा व्यवस्थित गर्न तयार पारिएको आर्थिक कार्यविधि विधेयक २०७४ आर्थिक मामिला तथा योजनामन्त्री विजयकुमार यादवले सोमबार प्रदेशसभामा छलफलका लागि टेबल गरेका थिए ।

मंगलबारको बैठकमा भाग लिने प्रदेशसभा सदस्यहरुले सरकार सञ्चालनको लागि महत्वपूर्ण रहेको उक्त विधेयक यथाशीघ्र पारित गर्नेतर्फ एकमत देखिएका छन् ।

बैठकमा भाग लिँदै विपक्षी दल नेपाली काँग्रेसका प्रदेशसभा सदस्य वीेरेन्द्रप्रसाद सिंहले दुई महिना बिति सक्दा समेत जनताले सरकारको अनुभूति गर्न नसकेको आरोप लगाए ।

सिंहले प्रदेश सरकार सञ्चालनका लागि चाहिने कार्यालय र कानून अविलम्व निर्माण गर्न सरकारलाई सुझाव दिएका छन् । त्यसैगरी नेकपा एमालेका प्रदेशसभा सदस्य शत्रुधन महतोले ढिलै भएपनि सरकारले आर्थिक कार्यविधि विधेयक छलफलको लागि ल्याएकोमा धन्यवाद दिए ।

सञ्चित कोष आर्थिक कोष व्यवस्थापन तथा अन्य आर्थिक गतिविधिका लागि विधेयक महत्वपूर्ण रहेकोले पास गर्न ढिलाई गर्न नहुने उनको कथन थियो ।

सत्ता साझेदार दल राजपाका प्रदेशसभा सदस्य परमेश्वर साहले विधेयक पारित भएमात्र सरकारले बजेट लगायत अन्य आर्थिक गतिविधि अगाडी बढाउन सक्ने भएकोले यथाशीघ्र पारित गराउन सहयोग गर्न प्रदेशसभालाई आग्रह गरे ।

विधेयक उपर प्रदेशसभा सदस्यहरुले उठाएको प्रश्नको जबाब दिँदै आर्थिक मामिला तथा योजनामन्त्री यादवले फागुन २५ गते नै विधेयक तयार भएपनि विभिन्न कारणले प्रस्तुुत हुन नसकेको तर्क गरे ।

मुलुकमा विद्यमान संक्रमणकालीन अवस्थाको कारण विधेयक पेश गर्न ढिलाई भएको उनको कथन थियो । सैद्धान्तिक छलफल सकिएको आर्थिक कार्यविधि विधेयकलाई बुधबार बिहान ११ बजे बस्ने बैठकमा निर्णयार्थ प्रस्तुत गर्ने कार्यसूची तयार गरिएको छ ।

प्रदेशसभामा प्रतिनिधित्व गर्ने राजनीतिक दलहरुले यथाशीघ्र विधेयक पारित गर्नेतर्फ संकेत गरेकोले बुधबारको बैठकमा विधेयक पारित हुने सरकारले विश्वास लिएको छ ।