जनकपुरबाट मोसा चोरी गरी भाग्दै गरेका महतो र मेस्तर पक्राउ

न्यूज ब्यूरो, जनकपुरधाम । जनकपुरको विभिन्न स्थानबाट मोसा (मोटरसाईकल) चोरी गरी भाग्दै गर्दा दुई युवकलाई धनुषा प्रहरीले पक्राउ गर्न सफल भएको छ ।

गत माघ २८ गते जनकपुरधाम उपमहानगरपालिका वडा नम्बर १९ बेँगाशिवपुरस्थितबाट मोटरसाईकल, पानी तान्ने कलमा प्रयोग गरिने मोटर, हाते कल समेत चोरी भएको सूचना पाएपछि प्रहरीले एक युवकलाई पक्राउ गरेको हो ।

मोटरसाईकल सहित कल, कलमा लगाएको पानी तान्ने मोटरसमेत चोरी भएको गुनासोको आधारमा धनुषा प्रहरीले जनकपुरधाम–बेँगाशिवपुर सडकखण्डमा चेकप्वान्ट थापेर चेकजाँच गर्दा जनकपुरधाम उपमहानगरपालिका वडा नम्बर १९ बेँगाशिवपुर बस्ने बर्ष २० को सुमित मेस्तरलाई पक्राउ गरेको हो ।

गत माघ २८ गतेको राती मोटरसाईकलसहितको ती समानहरु चोरी भएको घटना दर्तापछि माघ २९ गते विहान चेकप्वान्ट थापेर मेस्तरलाई पक्राउ गर्न सफल भएको बताइएको छ ।

उनको साथबाट ज १२ प ०६ नम्बरको एफजेड एस यामाहा कम्पनीको मोटरसाईकल १ थान, पानी तान्ने मोटर १ थान र हातेकल १ थान समानसहित पक्राउ गरिएको हो ।

यस्तै सोही दिन जिल्ला प्रशासन कार्यालय धनुषा (सिडिओ अफिस) कार्यालय अगाडीबाट मोटरसाईकल चोरी गर्ने अर्का एक युवकलाई पनि पक्राउ गरिएको हो ।

सिडिओ अफिस अगाडीबाट मोटरसाईकल चोरी गरेर भाग्दै गरेको अवस्थामा जिल्ला प्रहरी कार्यालय धनुषाबाट खटिएको प्रहरी टोलीले जनकपुरधाम वडा नम्बर ४ बस्ने रामललित महतोको छोरा अन्दाजी वर्ष १९ को सुजित कुमार महतोलाई पक्राउ गरिएको हो ।

उनले चोरी गरी लगेको ज. ८ प. ६२२ नम्बरको २२० सिसिको मोटरसाईकल र चोरी गर्न मोटरसाईकलमा प्रयोग भएको मास्टर कि (साँचो) समेत बरामद गरी महतोलाई पक्राउ गरी जिल्ला प्रहरी कार्यालय धनुषामा लगी आवश्यक अनुसन्धान प्रक्रिया अगाडी बढाएको बताइएको छ ।