MCC पास नगर्दा गठबन्धन फुट्छ भने फुट्न दिनुपर्छः मेयर बरबरिया

न्यूज ब्यूरो, जनकपुरधाम । नेपाल कम्यूनिष्ट पार्टी माओवादी केन्द्रका प्रदेश कमिटि सदस्य एवम् धनुषा शहिदनगर नगरपालिकाका मेयर उदय कुमार बरबरियाले एमसिसिप्रति आफ्नो धारणा जाहेर गरेका छन् ।

गठबन्धन जोगाउने शर्तमा अमेरिकी सहायता परियोजना (एमसिसि) अनुमोदन गर्नुपर्ने शर्तलाई बहिष्कार गरी गठबन्धनबाट बाहिर हुनुपरे गठबन्धनमा बस्नुको पनि औचित्य नहुने धारणा राखेका छन् ।

सत्तापक्षसहित चार दलको गठबन्धनमा अहिले एमसिसि पास गरे मात्र गठबन्धन बस्ने जस्ता धारणापछि बोल्दै मेयर बरबरियाले यसको अनुमोदनले गठबन्धन फुट्छ भने फुट्न दिनुपर्ने बताएका छन् ।

“यदि एमसीसी संसदमा टेवल नगर्दा वा अमेरिकाको इच्छा अनुसार पारित नगर्दा गठबन्धन टुट्छ वा सरकार ढल्छ भने ढल्न दिनुपर्छ,’–उनले भने ।

उनले एमसिसि पास हुँदा जनताको भावना ठेस पुग्ने वर्तमान अवस्थालाई मध्यनजर गरी त्यही पास भए मात्र गठबन्धन बच्छ भने त्यस्तो गठबन्धनमा बस्नुको कुनै औचित्य नहुने बताएका छन् ।

न्यूज ब्यूरोसँगको संक्षिप्त कुराकानीमा मेयर बरबरियाले अहिले देशैभरिका जनताहरु एमसिसि पास नगर्नको लागि विभिन्न आन्दोलन गरिरहेकोले जनताको भावनालाई लात्त हानेर एमसिसि पास भए कुनै पनि राजनीतिक दललाई जनताले मान्नुपर्ने आधार नरहने धारणा राखे ।

“अमेरिकी सरकारको नीतिले नेपाली नागरिक, नेपाली जनताको जुन आस्था, देशप्रतिको आस्था छ त्यसमा केही न केही मनोभाव खस्नेछ, जनभावना विपरित कार्य गरेर सत्तामा बस्नुको के औचित्य । कम्यूनिष्टको धारणामा जनभावना विपरित कार्य हुनुहुँदैन । जनताले नचाहेको अवस्थामा गठबन्धनमा बस्ने यो शर्त मान्य गर्नुहुँदैन ।”– उनले भने ।