जसपा पर्सामा नयाँ मोड, अध्यक्षमा यादव कि अन्सारी ?

न्यूज ब्यूरो, वीरगँज । जनता समाजवादी पार्टी (जसपा) पर्सामा दुईवटा समानान्तर कार्यसमितिको विवादले नयाँ मोड लिएको छ । गठित दुईवटै कार्यसमितिले आफुलाई बैधानिकता दिलाउन कसरत गरिरहेका छन् ।

शनिबार जसपा मधेस प्रदेश समितिका मुख्य सचिवले रामनरेश यादवको अध्यक्षतामा रहेको समितीलाई आधिकारिता दिएको विज्ञप्ति जारी गरेपछि आइतबार सोही समितिकै उपाध्यक्षले अर्को विज्ञप्ती जारी गर्दै सचिवको विज्ञप्ति प्रति आपत्ति जनाएका छन् ।

पार्टीका मधेस प्रदेश समितीका उपाध्यक्ष सुशिल यादवले आइतवार प्रेस विज्ञप्ती जारी गर्दै मुख्य सचिव दिनेश कुमार यादवले व्यक्तिगत रुपमा हस्ताक्षर भएको विज्ञप्तीको कुनै औचित्य नभएको भन्दै आपत्ति जनाएका हुन् ।

झण्डै दुई तिहाई सदस्यहरुको सर्वसहमतिको आधारमा पार्टीको विद्यानबमोजिम जसपा पर्सा जिल्ला समन्वय तदर्थ समिति गठन गरेको जानकारी लिखित रुपमा मधेस प्रदेश समितिमा प्राप्त भएको बताउँदै त्यसको विषयमा प्रदेश समितीमा कुनै पनि बैठक नबसेको हुँदा मुख्य सचिवले एकलौटी ढंगमा विज्ञप्ती जारी गरेको भन्दै उपाध्यक्ष यादवले विज्ञप्तीमार्फत खेद प्रकट गरेका छन् ।

‘व्यक्तिगत तवरले हचुवाको भरमा बैठक नै नबसेको, छलफल नै नभएको कुरा विज्ञप्ति जारी गर्नु दुःखद र खेदजनक हो । तसर्थ मुख्य सचिव दिनेश यादवको व्यक्तिगत हस्ताक्षरित विज्ञप्तिको कुनै औचित्य समेत नभएको कुरा स्पष्ट पार्न चाहन्छु ।’ उपाध्यक्ष यादवद्वारा जारी विज्ञप्तीमा उल्लेख छ ।

मधेस प्रदेश समितिको औपचारिक बैठक बसी पार्टीको विद्यान बमोजिम हो वा होइन भन्ने निस्कर्ष निकालेर केन्द्रिय समितिले गर्ने निर्णय नै आधिकारिक हुने पनि पनि उनले स्पष्ट पारेका छन् ।

यसअघि मधेस प्रदेश समितिका मुख्य सचिव दिनेश कुमार यादवले प्रेस विज्ञप्ती जारी गर्दै रामनरेश प्रसाद यादवलाई नै आधिकारिक अध्यक्ष भएको दावी गरेका थिए ।

जिल्ला अध्यक्ष रामनरेश यादवसँग रुष्ट सदस्यहरुले प्रदेशसभा सदस्य अबुदुल रहिम अन्सारी (मन्जुर अन्सारी) को नेतृत्वमा समान्तर कमिटी गठन गरेका छन् ।

अध्यक्ष यादवले पार्टीको हित विपरित काम गरेको आरोप लगाउँदै बहुमत सदस्यहरुले माघ २ गते बैठक बसेर उनलाई कारवाही गर्दै अध्यक्ष पदबाट हटाएका थिए ।

यादवलाई कारवाही गरेदेखिनै दुवै पक्षले आफुलाई बैधानिकता दिलाउन कसरत गरिरहेका छन् । दुवै पक्षको विवादका कारण कार्यकर्ता भने अन्योलमा परेका छन् । उनीहरुले पार्टीको आधिकारीक जिल्ला अध्यक्ष को र नक्कली अध्यक्ष को भनेर छुट्याउन नसकेको प्रतिक्रिया दिएका छन् ।

---

वीरगँजबाट प्रकाशित हुने यात्राडेलीमा समाचार छ। ।