आजदेखि जनकपुरमा पनि स्मार्ट लकडाउन, भ्याक्सीन लगाएको कार्ड अनिवार्य

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधामसहित धनुषा जिल्लाभरि लागु हुने गरी स्मार्ट लकडाउनको अवधारणा पालन गर्न अनुरोध गरिएको छ ।

जिल्ला प्रशासन कार्यालय धनुषाले बुधबार एक प्रेस विज्ञप्ति जारी गर्दै जनकपुर सहित धनुषा जिल्लाभरि २५ जना भन्दा बढीको भेला वा कार्यक्रमहरु नगराउन आदेश जारी गरिएको हो ।

अत्यावश्यक तथा नियमित कार्यक्रमको लागि प्रशासनबाट अनुमति लिएर मात्र त्यस्ता कार्यक्रमहरु गर्न पाउने गरी सूचना प्रकाशित गरिएको छ । प्रशासनबाट अनुमति लिएर त्यस्ता कार्यक्रमहरु गर्न पाउने भनिएको छ ।

यस्तै, सार्वजनिक स्थलहरु जस्तै होटेल, पार्क, मन्दिर, रँगशाला, हवाई यात्रा गर्दा आउँदो माघ ७ गतेदेखि अनिवार्य रुपमा खोप कार्ड देखाउनुपर्ने भनिएको छ । कार्डमा दुवै डोज लगाएको अनिवार्य हुनुपर्ने भनिएको छ ।

कार्ड नभएको अवस्थामा कम्तीमा मोबाईलमा भ्याक्सीन लगाएको खोप कार्डको फोटो देखाउन अनिवार्य गरिएको छ । कोरोना विरुद्धको खोप अहिले धनुषाको विभिन्न स्थानीय तहमा जारी रहेको छ ।

स्वास्थ्य कार्यालय धनुषाले सीमानाकामा निःशुल्क एन्टीजेन परीक्षणको लागि व्यवस्था मिलाउन तथा निरन्तर र नियमित अनुगमनको लागि निर्देशन जिल्ला प्रशासन कार्यालय धनुषाले दिएको हो ।

यस्तै, १२ बर्षदेखि १७ बर्षसम्मका किशोर किशोरीहरुलाई अनिवार्य खोप लगाउन भनिएको छ । सबै पालिकाहरुको वडा कार्यालय वा स्वास्थ्यचौकीमा जारी रहेको खोप अभियानको क्रममा आ–आफ्ना बालबालिकाहरुलाई अनिवार्य खोप लगाउन निर्देशन दिएको हो । एक हप्ताभित्रै सबै जनालाई खोप लगाउन भनिएको छ ।

नेपाल सरकारको शिक्षा मन्त्रालयलाई उदृत गर्दै आगामी माघ १५ गतेसम्म धनुषाभरिका नीजि तथा समुदायिक विद्यालय बन्द गर्ने निर्णयलाई कार्यन्वयन गर्न पनि भनिएको छ ।

सरकारी कार्यालयमा सेवा प्रवाहको लागि अनिवार्य रुपमा स्वास्थ्य मापदण्डको पालना सहित भीडभाड हुने सरकारी कार्यालयमा भीड व्यवस्थापन गर्न निर्देशन दिएको हो ।