कमला नपाको नक्कली नाम र हस्ताक्षरमा "जाली सुचना"

न्यूज ब्यूरो ||
धनुषा, ७ चैत्त । धनुषाको कमला नगरपालिकामा नक्कली नाम र हस्ताक्षरमा नक्कली सुचना जारी गरिएको भेटिएको छ ।

स्थानीय तह सँचालनको निर्देशिका बमोजिम कुनै पनि सुचना टाँस वा जारी गर्दा कम्तिामा एक साता अघि नै शिर्षक सहितको सुचना जारी गर्नुपर्ने प्रावधान भएपनि नगरपालिकाको लेटरप्याडमा नक्कली नाम र हस्ताक्षर गरी नक्कली मिति समेत उल्लेख गरिएको सुचना भेटाएको छ ।

परिषद्मा सार्वजनिकीकरण गरिएपछि फागुन ३ गतेको लागि बन्द सत्र गर्ने सर्वसहमतिले निर्णय गरिएपनि माघ ३ गतेमा सुचना काटिएको पाइएको छ ।

गत माघ २९ गते सम्पन्न सार्वजनीकीकरण कार्यक्रममा गरिएको निर्णय फागुन ३ बाट बन्द सत्र सुरु गर्ने भनिएपनि नगर प्रमुख राम उदगार गोईले मौखिक रुपमा फागुन २० गतेदेखि बन्द सत्र गर्ने सुचना मात्र पाएको नगरपालिका वडा नं. १ का वडाध्यक्ष राजकुमार यादवले न्यूज ब्यूरोसँग भने ।

'फागुन २० गतेदेखि मेयर राम उदगार गोईतले आफूखुसी दुबरकोट हथलेटवामा बन्द सत्रको लागि बैठक बोलाए, हामी २० जना सहभागी भएनौ, तर पनि बन्द सत्रबाट केन्द्र सार्ने जस्ता गम्भिर निर्णयहरु ३० जना बसेर गरियो । हामीलाई सुचना आएको छैन भनेर गुनासो गर्दा ब्याक मिति अर्थात बैठक अघिको मितिमा जाली र नक्कली सुचना काटिएको पाए ।' उनले भने ।

'सुचना काटिएको मिति र विभिन्न वडा कार्यालयहरुमा टाँस गरिएको मिति र समय देखाउँदै भने, ९ वटै वडाको सुचना एकै समयमा टाँस भएको छ, यो कसरी सम्भव छ ? ९ वटै वडा कार्यालयमा गएको व्यक्ति ठयाक्क १० बजे कसरी टाँस गरियो ? र टाँस गरिएपनि हेर्ने को ? हामी त कत्तै देखेनौ त ? ।'

उनले भने, 'माघ १० गतेको लागि सुचना काटिएको छ, सुचना माघ ३ गतेमा काटिएको छ, सुचना टाँस गर्दा सबैको एउटै समय छ , ठिक १० बजे । सुचना टाँस गर्दा हेर्ने साक्षीहरु पनि नक्कली व्यक्तिको नाम र हस्ताक्षर गरिएको छ ।'

बिना दर्ता र चलानीको सुचना काटिएको भन्दै वडा नं. १ को कार्यालय मँगराहामा सुचना टाँसको बेला साक्षी हुनेहरु नक्कली मान्छे हुन भनेर दाबी गरेका छन् । साक्षीमा नाम लेखिएको पल्टु मण्डल र लक्ष्मण मण्डल स्थानीय मँगराहाको नभई दुबरकोट हथलेटवाको व्यक्ति भएको दाबी गरेका छन् ।

उनले भने, 'साक्षीको नाम र हस्ताक्षर सब नक्कली छ, म दुवै व्यक्तिलाई राम्ररी चिन्दछु, दुवै व्यक्ति हाम्रो वडाका होइनन, दुवै ९ नं. वडाका व्यक्ति हुन अनि कसरी ठिक १० बजे हाम्रो कार्यालयमा उपस्थित भए त? जबकी १० बजे हाम्रो कार्यालय नैै खुलेको हुँदैन । '

यस्तै, 'वडा नं. २ र ३ को कार्यालय माचि झिटकैयामा अवस्थित छ, वडा नं. २ को कार्यालयमा सुचना टाँस गर्दा श्रीप्रसाद तेथवार र राजीन्द्र बनरैतको नाम हालेर नक्कली हस्ताक्षर गरिएको छ । जो की त्यस वटाका व्यक्ति नै होइनन्, दुवै जना वडा नं. ३ लगमाका निवासी हुन्, अनि कसरी कार्यालयमा पुगेर साक्षी बने ? ।' वडा नं. २ का वडाध्यक्ष धनेश्वर यादवले भने ।

यस्तै, वडा नं. ३ को कार्यालय पनि माचि झिटकैयामा भएकोे भएपनि सुचना टाँस गर्दा बनेका साक्षी भने वडा नं. ३ लगमा बस्ने व्यक्ति किशोरी गोहितमान र राजेश्वर गोईत हुन ।

वडा नं. ४ को लागि सँजे तेथवार र विमल बनरैतको नक्कली नाम र हस्ताक्ष गरिएको छ भने वडा नं. ५ लक्कडको लागि डोमा पासवान र जस्विर पासवानको नक्कली हस्ताक्षर गरि सुचना टाँस गरिएको भनेर देखाइएको छ ।

वडा नं. ८ को लागि जोगि रोहिता र तृपित भुरेरको नाम देखाइएको छ , जबकी जोगी रोहिता भन्ने व्यक्ति सधैँ बन्दीपुरमा बस्दै आएका छन् ।

यही पाराले किर्ते र नक्कली कार्य नगरपालिकामा गरिए वडा कार्यालयका कार्यहरु ठप्प पार्ने चेतावनी समेत वडाध्यक्षहरुले मेयर गोईतलाई दिएका छन् ।

यता, नगर प्रमुख राम उदगार गोईतले भने नक्कली सुचना भएको भनेर अस्विकार गरेका छन् । आफू कहाँ सुचना आएपछि हस्ताक्षर गरी जारी गरेको स्वीकार्दै उनले भने , 'एकै समयमा कसरी टाँस भयो सुचना मलाई थाहा छैन, अब ९ वटै वडाको लागि ९ जना गएको होला टाँस गर्न तर मलाई यथार्थ थाहा छैन । मैले मात्र सुचना जारी गरेको छु, अब को को साक्षी छ र कसरी टाँस भयो त्यो मलाई थाहा छैन ।'

यसका साथै, वडा नं. २ का वडा सचिव युगल किशोर यादवले भने सुचना प्रवाहको जिम्मेवारी सधैँ आफूलाई मौखिक रुपमा भएपनि अहिलेसम्म कुनै प्रकारको सुचना काटेर नबाँडिएको जिकिर गरे ।

अहिलेसम्म फोन मार्फत नै सबै पदाधिकारीहरुलाई जानकारी गराउने जिम्मा मेरो थियो, म फोनबाट जानकारी गराउँथे तर सुचना भने कहिल्यै टाँसेन म ।