'चिट चोर्नलाई सिधा रेस्ट्रिकेट गर्छौं' : जिशिअ खड्का

न्यूज ब्यूरो ||
जनकपुरधाम, ७ चैत्त । ग्रेडिँग प्रणालीको परीक्षाफल निकाल्ने एसईई परीक्षा भोली विहिबारदेखि सुरु हुँदैछ ।

धनुषामा परीक्षाको सम्पूर्ण तयारी भईसकेको जिल्ला शिक्षा अधिकारी यम बहादुर खड्काले न्यूज ब्यूरोसँग भने ।

धनुषाबाट जम्मा १० हजार ९ सय ९२ जना परीक्षार्थी सहभागी हुने खडकाले बताएका छन् ।

करिब ११ हजार परीक्षार्थीको लागि जिल्ला भरिमा ४३ वटा परीक्षा केन्द्र तोकिएको छ भने ४३ जना सुपरिटेन्डेन्ट (केन्द्राध्यक्ष) तथा १०० जनाको हाराहारीमा सहायक केन्द्राध्यक्ष नियुक्त गरिएको जिशिअ खड्काले न्यूज ब्यूरोसँग भने ।

परीक्षामा चोरी गर्ने परीक्षार्थीलाई सिधै रेस्ट्रिीकेट गर्ने तथा परीक्षा केन्द्रबाट बाहिर गर्ने जनाउँदै खड्काले चोरी गराउने सहायक व्यक्तिलाई पनि कारवाहीको दायरामा ल्याउने जनाए ।

परीक्षाकेन्द्र भित्रै चिट चोरी हुने गरेको सन्दर्भमा कुरा गर्दे प्रजिअ खड्काले परीक्षाकेन्द्र भित्र चिट चोराउने गार्ड वा अन्य कर्मचारीलाई समेत परीक्षाबाट निष्कासन सहित कानुन बमोजिमको कारवाही गर्ने प्रतिवद्धता जनाए ।

परीक्षा अनुगमनको लागि ६ वटा अनुगमन टोली धनुषामा गठन गरिएको छ । प्रमुख जिल्ला अधिकारीको नेतृत्वमा, नेपाल प्रहरीका एसएसपीको नेतृत्वमा, शसस्त्र प्रहरीका एसएसपी, जिल्ला शिक्षा अधिकारी, राष्ट्रिय परीक्षा बोर्डका हाकिम, निर्वाचन अधिकृत, उप सहायक जिल्ला शिक्षा अधिकारी सहितको नेतृत्वमा ६ अनुगमन टिम बनाइएको हो ।

प्रत्येक परीक्षा केन्द्रमा १० जना नेपाल प्रहरी समेत सुरक्षाको दृष्टिकोणले खटाइएको जनाइएको छ ।

प्रश्नपत्र जिल्ला प्रहरी कार्यालय धनुषामा मार्फत स्थानीय तहमा ईलाका प्रहरी कार्यालयमा पठाइने जनाउँदै जिशिअ खडकाले परीक्षाको १० मिनेट अघि मात्र प्रश्नपत्र परीक्षाकेन्द्रमा लग्नुपर्ने बताएका छन् ।