सिरहाः बेबारिसे झोलामा ड्रग्स

न्यूज ब्यूरो, सिरहा । प्रदेश २ को सिरहा जिल्लास्थित सडकको किनारमा राखिएको एक बेबारिसे झोलामा ड्रग्स फेला परेको छ ।

गत मँगलबार सिरहाको लहान नगरपालिका वडा नम्बर १९ लहान ठांडी सडकखण्डमा बेबारिसे फालिएको झोला चेकजाँचको क्रममा ड्रग्स बरामद भएको हो ।

शसस्त्र प्रहरीको लहान बेस क्याम्पबाट राती ९ बजेको समयमा डिएसपी सुशिल श्रेष्ठको कमाण्डमा गएको ७ प्रहरीको टोलीले सो बेबारिसे झोला फेला पारेको हो । लहान नपाको वडा नम्बर १९ छारापट्टिस्थित झोला खोलेर हेर्दा त्यसमा लागुऔषध भेटिएको बताइएको छ ।

सडकको किनारमा राखिएको बेबारिसे झोला शँका लागेर खोली हेर्दा त्यसमा ४० एम्पुल डायजोपाम, ४० एम्पुल प्रोमिथोजीन, ४५० एम्पुल बिना स्टीकरको लागुऔषध, ४ पत्ता नोफिन ब्यागभित्रै फेला परेको हो ।

झोला चेकजाँचपछि लागुऔषध बरामद भएपछि आवश्यक कारवाहीको लागि ईलाका प्रहरी कार्यालय लहान पठाएको बताइएको छ ।