'राजपा र फोरम सहमति भन्दा अलिक पर मात्रै छ' : प्रचण्ड

न्यूज ब्यूरो ||
सिरहा, ७ चैत्त । सरकारमा सहभागिताको संभावना क्षिण भएको बेला सत्तारुढ दल माओवादी केन्द्रका अध्यक्ष पुष्पकमल दहाल‘ प्रचण्ड’ले मधेशी दलहरु फोरम र राजपासितको वार्ता सहमति नजिक पुगेको बताएका छन् ।

मंगलवार सिरहा जिल्लाको बरियारपट्टीमा हुलाकी राजमार्गको सिलान्यास समारोहमा प्रचण्डले भने, संविधान संशोधन सम्बन्धि छलफल सहमती नजिक पुगेको छ ।

फोरम र राजपाको असन्तुष्टि संविधान संशोधनमार्फत सल्टाईने उनले बताए ।

संविधान संशोधनमा अब दुवीधा छैन् ’प्रचण्डले भने, ‘उपेन्द्रजी र महन्थजीसँगको छलफल छिटै सहमतीमा टुंगिन्छ ।’

संविधान संशोधनमा सहमती भएसँगैै फोरम र राजपा पनि सरकारमा सहभागी हुने उनले दावी गरे । ‘जनभावना अनुसार संविधान संशोधनको पक्षमा हामी छौ ’ उनले भने, ‘संविधान संशोधन गरी हिमाल पहाड र मधेसलाई जोडेर देशमा समृद्धिको लहर ल्याईने छ ’।

वाम गठबन्धनको मात्र नभई प्रदेश २ मा सरकार बनाउने फोरम र राजपाको समेत समर्थनको सरकार हो ’माओवादी अध्यक्ष प्रचण्डले भने, मधेसी दलको समर्थनले वाम गठबन्धनको यो सरकार राष्ट्रिय सहमतीको सरकारकै सरह हो ’।

मधेशी दलहरुले संविधान संशोधनका लागि वाम–गठबन्धन सरकार तयार नरहेको आरोप लगाउँदै सरकारमा सहभागि भएका छैनन् ।

संविधान संशोधनको सुनिश्चितता नभए सम्म सरकारमा सहभागि नहुने अडानमा रहेका मधेशी दलहरुसितको एमाले–माओवादीका शीर्ष नेताहरुसितको वार्ता सफल हुन सकेको छैन् ।

सरकारले प्रदेश २ का लागि विकासको विशेष प्याकेज तयार पार्दै छ’, प्रचण्डले भने, ‘आगामी बजेटमा मधेस विकासको विशेष प्याकेज घोषणा हुन्छ ढुक्क हुनुस् ।’

कार्यक्रममा सहभागी मुख्यमन्त्री राउतले मानव विकास सूचकांकमा पछाडि परेको यो प्रदेशको विकासका लागि विशेष प्याकेज ल्याउन आग्रह गरेका थिए ।

कार्यक्रममा भौतिक,पूर्वाधार तथा यातायात मन्त्री रघुबीर महासेठले प्रदेश नम्बर २ मा सरकारले विकासको विशेष प्याकेज ल्याउन लागेको बताउँदै एमाले सरकार मधेशको विकासप्रति प्रतिबद्ध रहेको दावी गरे ।

मन्त्री महासेठले प्रदेश नम्बर २ मा भौतिक पूर्वाधार विकासको प्याकेज लिएर आउने घोषणा गरे ।‘पार्टी कार्यालयमा राजनीति गरौ’ उनले भने,‘विकास निर्माणको कार्यमा राजनीति नगरौ ।

२९।९ किलोमीटर लामो हुलाकी राजमार्ग स्तरोन्नतीको लागत १ अर्व २० करोड २० लाख रुपैयाँ बजेट रहेको छ । तीन वर्ष भित्र सो राजमार्गको स्तरोन्नती कार्य पूरा गर्नुपर्ने ठेक्कामा सहमति भएको छ ।

धनुषाको सीमा कमला नदीदेखि सप्तरीको सीमा बलान नदी सम्म सिरहा जिल्लामा हुलाकी राजमार्ग २९।९किलोमिटर रहेको छ ।

उक्त राजमार्ग निर्माणपछि राजविराज र जनकपुरको हालको दुरी भन्दा आधी घटने छ भनेर आजको जनकपुर टुडै दैनिकमा समाचार प्रकाशित भएको छ ।