किसानको २ अर्ब भुक्तानी किन रोके एभेरेष्ट सुगर मिल ?

न्यूज ब्यूरो ||
बर्दिवास, ६ चैत्त । महोत्तरी जिल्लाको रामनगरमा सञ्चालित एभरेष्ट सुगर एण्ड केमिकल ईण्डष्ट्रिजले उखु किसानहरुको झण्डै २ अर्ब भुक्तानी रोकेको छ भनेर आजको जनकपुर टुडे दैनिकमा समाचार छापिएको छ ।

सुगर मिलले किसानहरुबाट ३४ लाख क्विन्टल उखु खरिद गरी चिनी उत्पादन गरिसकेको छ ।

मिल अझैपनि चालु छ ।किसानहरुलाई प्रति क्विन्टल उखुको मुल्य मिलले ५ सय ३० रुपैया ८५ पैसा निर्धारण गरेको छ ।एभरेष्ट मिलमा उखु बेचेका किसानहरुलाई यस वर्ष उखुको भुक्तानी गरिएको छैन् ।

सहमति अनुसारको मुल्य बमोजिम किसानहरुले मिलबाट १ अर्ब ८०करोड ४८ लाख ९० हजार रुपैया लिनु पर्नेछ ।

तर मिल सञ्चालकहरुले किसानको उखुको मुल्य भुक्तानी गरिरहेका छैनन् । ‘बिहाबारी, मरणहरणमा समेत मिलले उखुको मुल्य भुक्तानी दिएको छैन्’ महोत्तरी औरहीका किसान सोनेलाल महतोले भने, चिनी मिल सञ्चालकहरुले महँगोमा चिनी बेच्ने तर किसानको मुल्य भुक्तानी नगर्ने प्रवृती बढेको छ ।

एभरेष्ट सुगर मिलले नयाँ सिजन सुरु हुनु अगाडी प्रति क्विन्टल ८ हजारको दरले चिनी बिक्री गरेको थियो ।

तर अहिले किसानहरुलाई चिनीको मुल्य कम भएको भन्दै भुक्तानी रोकेको छ ।

जानकारहरुका अनुसार चिनी मिलले ७ हजारको दरमा अहिलेपनि चिनी बिक्री गरिरहेको र अझै मुल्य बृद्धि गर्न लविंग गरिरहेको छ ।

कृषि जन्य उद्योगलाई प्राथमिकतामा राखेर प्रदेशलाई समृद्ध बनाउने योजनामा रहेको प्रदेश सरकारलाई चिनी मिल सञ्चालकहरुले ठूलो धोका दिने देखिएको छ ।

खेतमा अर्को बाली लगाउन समेत किसानलाई रकमको अभाव र बैँक तथा स्थानीय साहुहरुसित लिएको ऋणको ब्याज बढिरहेपनि मिल सञ्चालकहरुले वेवास्तागर्दै किसानलाई आत्महत्या गर्न बाध्य बनाउन थालेको उखु किसानहरु आक्रोश व्यक्त गर्छन् ।

भारतको महाराष्ट्र लगायतका प्रान्तहरुमा किसानले आत्महत्या गर्न बाध्य हुने कारण नै मिल सञ्चालकहरु रहेको महतो बताउँछन् ।

‘ऋण लिएर खेती गरेका किसानहरुले समयमै उखुको भुक्तानी नपाउँदा ब्याज बढेपछि लागत खर्च समेत असुल हुन सक्दैन्’ महतोले भने, चिनी मिल मालिकहरुले किसानको रकम रोकेर अन्य क्षेत्रमा लगानी गरी ब्याजकै रकमबाट सम्पती जोड्ने गरेका छन् ।

बैंकको हालको प्रचलित ब्याज दर अनुसार चिनी मिल सञ्चालकले महिनाको २ करोड रुपैया किसानको रकम रोकेर ब्याजमा कमाइरहेको आरोप किसानहरुले लगाएका छन् ।

यस सम्बन्धमा चिनी मिलका प्रबन्ध निर्देशक सरेश सर्राफसित सम्पर्क गर्ने प्रयास सफल हुन सकेन् । आजको जनकपुर टुडे दैनिकमा समाचार छ ।