निलम्बीत प्रअ 'सुपरिटेन्डेन्ट', मेयर बरबरिया तनावमा

न्यूज ब्यूरो ||
जनकपुरधाम, ६ चैत्त । ७० लाख रुपैयाँको घोटालामा निलम्बन गरिएका धनुषाका एक प्रधानाध्यापकलाई एसईई (SEE) परीक्षाको लागि सुपरिटेन्डेन्ट (केन्द्राध्यक्ष) बनाइएको छ ।

धनुषाको शहिदनगर नगरपालिका वडा नं. ७ धबौली माविका प्र.अ. श्रीप्रसाद गोहिवारलाई शिक्षा अधिकारी र सिडिओले त्यही माविका लागि केन्द्राध्यक्ष बनाएको हो ।

स्थानीय तह सँचालन ऐन २०७४ अनुसार गोहिबारलाई नगरपालिकाको केबिनेटबाट निलम्बन गरिएपनि शिक्षा अधिकारी र सिडिओले केन्द्राध्यक्ष बनाउनु मोटो रकमको चलखेल गरिएको आरोप मेयर उदय कुमार बरबरियाले लगाएको छ ।

आज मेयर बरबरियाले न्यूज ब्यूरोसँग कुरा गर्दै ७० लाख बढीको भ्रष्टाचारमा निलम्बन प्रक्रियामा रहेका प्र.अ. गोहिबारलाई आर्थिक चलखेल गरेर सिडिओ र शिक्षा अधिकारी केन्द्राध्यक्ष बनाएको दुःखद् छ । तर नगरपालिकाले गोहिबारलाई केन्द्राध्यक्षको रुपमा कदापी स्विकार गर्नेछैन, नगरपालिकाले आफैँ परीक्षा सँचालन गर्नेछ ।

उनले भने, त्यस्ता भ्रष्टाचारी प्रअलाई कुनै पनि हालतमा नगरपालिकाले केन्द्राध्यक्षको रुपमा स्विकार गर्नेवाला छैन , शिक्षा कार्यालयले तुरुन्त यस्ता शिक्षकलाई केन्द्राध्यक्षबाट हटाउनुपर्छ ।

नगरपालिकाले नगरभित्रका विद्यालयहरुमा परीक्षा आफैँ सँचालन गर्ने भन्दै बरबरियाले केन्द्राध्यक्ष पनि नगरपालिकाले तय गर्ने बताएका छन् ।

मेयर बरबरियाले गत माघमा विद्यालयको शिक्षकको गुनासा तथा प्रअलाई विद्यालयको आयव्यय पेश गर्न आदेश दिएपनि तोकिएको समयमा पेश नगरेपछि स्थानीय तह सँचालन ऐन अनुसार प्रअ गोहिबारलाई सर्वसहमतिले निलम्बन प्रक्रियामा राखेका हुन् भने विगत ५ महिनादेखि तलब समेत रोक्का गरिएको छ ।