जनमत पार्टीको भ्रष्टाचार विरूद्ध आन्दोलनलाई अमेरिकाबाट समर्थन

न्यूज ब्यूरो, अमेरिका । दुई हफ्तादेखि चलिरहेको जनमत पार्टीको भ्रष्टाचार विरुद्ध आन्दोलनलाई अमेरिकामा बसोबास गरीरहेका नेपालीहरूले समर्थन जनाएका छन्।

समर्थन स्वरूप केही व्यक्तिहरु शनिबार ह्वाइट हाउस अगाड़ी बैनर लगाई प्रदर्शन गरेका छन्। सो प्रदर्शनलाई ई. धीरज कुमारले फेसबुक लाइभ गरेका थिए।

नेपाल सरकारले जनमत पार्टीका निर्दोष १७ कार्यकर्तालाई गिरफ़्तार गरी हिरासतमा राखेकोमा सो कार्यकर्ताहरुको निस्शर्त रिहाईको माँग गरेका छन्।

रिहाई नगरे संयुक्त राष्ट्र संघ लगाएत अन्य बिदेशी मानव अधिकार संघ संघठन मार्फ़त आवाज उठाउने समेत जानकारी गराइएको छ।

भ्रष्टाचार विरुद्ध आन्दोलनका नायक ओम बिक्रम कुशवाहा लगाएत जनमत पार्टीका १७ नेता कार्यकर्ता अहिले धनुषा प्रहरीको हिरासतमा छन्। उनीहरुलाई जनकरवाही गरे वापत मुद्दा चलाउने नेपाल प्रशासनले तयारी गरेको बुझीएको छ।

जनमत पार्टीले घोषणा गरेको पहिलो चरणको कार्यक्रम हाल जारी रहेको छ। सो अनुरूप हिजो मधेशको २० जिल्ला सदरमुकाममा जनमत पार्टीले सफलता पूर्वक मशाल जुलुस निकालेको थियो।

भ्रष्टाचार विरुद्धको आन्दोलन जारी रहने जनमत पार्टीका केन्द्रीय उपाध्यक्ष ई. बसन्त कुशवाहाले जनाएका छन्।

यता, जनमत पार्टीको जनकपुरस्थित रहेको पार्टी कार्यालयमा ईन्जिनीयरहरुले तोडफोड गरेको भन्दै जिल्ला प्रहरी कार्यालय धनुषामा उजुरी परेको छ । जनमत पार्टीले जसपाका धनुषा जिल्ला अध्यक्ष सहित जसपाका कार्यकर्ताहरु लगायत केही ईन्जिनीयरहरुमाथि जाहेरी दर्ता गराएको हो ।