यातायात कार्यालय लहानको उर्दी– ट्रायल सेन्टरमा फोटो वा भिडियो खिच्न पाईदैन

न्यूज ब्यूरो, सिरहा । प्रदेश नम्बर २ को सिरहा जिल्ला लहानस्थित रहेको यातायात कार्यालय लहानले ट्रायल स्थलमा फोटो तथा भिडियो खिच्न प्रतिबन्ध लगाएको छ ।

यातायात कार्यालय लहानले एक सूचना जारी गर्दै प्रयोगात्मक परीक्षा (ट्रायल) स्थलमा कुनै प्रकारको फोटो वा भिडियो खिच्न नपाउने भनेर उल्लेख गरेको छ । ट्रयाल स्थलमा आफूखुसी फेल हुनेलाई पनि पास गर्ने गरी र अनियमितता लुकाउनको लागि सो उर्दी जारी गरेको हो ।

यातायात कार्यालय लहानका प्रमुख मिन बहादुर भट्टराईले ट्रायल सेन्टरमा कसैले फोटो वा भिडियो खिचेमा मोबाईल खोस्ने धम्कीपूर्ण सूचना दिएको गुनासो गरिएको छ ।

यातायात कार्यालयको मातहतमा हुने ट्रायलको समयमा अनियमितता गर्नको लागि यस्तो प्रतिबन्ध लगाएको गुनासो आम नागरिकहरुले गरेका छन् । ट्रायल सेन्टरमा फोटो भिडियो लिए वास्तविक पास फेल यकिन गर्न पनि सजिलो हुने भएपनि यस्तो उर्दी अनियमितताकै लागि लगाएको जनगुनासो आएको छ ।