जनकपुरका युनिभर्सल एकेडमीले लक्ष्मीनियाँ गाउँपालिकाका विद्यार्थीलाई छात्रवृतिमा पढाउने

न्यूज ब्यूरो, जनकपुरधाम । जनकपुरधामस्थित रहेको युनिभर्सल एकेडमीले धनुषाको लक्ष्मीनियाँ गाउँपालिकाका विद्यार्थीहरुको लागि छात्रवृति प्याकेज ल्याएको छ ।

लक्ष्मीनियाँ गाउँपालिका वडा नम्बर १ सिनुरजोडा बस्ने कलेजका सँचालक एवम् गायक समेत रहेका सँजय यादवले आफ्नो गाउँपालिकाका विद्यार्थीहरुलाई सहज हुने गरी छात्रवृति प्याकेज ल्याएको बताएका छन् ।

कलेजमा अध्ययनको लागि सो गाउँपालिकाको वडा नं. १ देखि ७ सम्मको वडाका विद्यार्थीहरुमध्ये गरिब, विपन्न, जेहेन्दारलाई छात्रवृति प्रदान गर्नेछ । त्यसको लागि गाउँपालिकाभरिबाट कुल १४ जना विद्यार्थीलाई छात्रवृति प्रदान गरिने जनाइएको छ ।

प्रत्येक वडाबाट एक छात्रा र एक छात्र गरी दुई जनालाई छात्रवृति दिइने जनाइएको छ । सँचालक यादवका अनुसार, प्रत्येक वडाबाट त्यस्ता विद्यार्थी छनौटको लागि सम्बन्धित वडाध्यक्षहरुले सहयोग गर्ने जनाएको छ ।

वडाध्यक्षले त्यस्ता छात्रछात्रालाई पहिचान गरी कलेजलाई सिफारिस गर्ने सँचालक यादवले बताए । उनका अनुसार, गाउँपालिकाको शिक्षामा टेवा पुरयाउने उदेश्य सहित आर्थिक अभावका कारण उच्च शिक्षा हाँसिल गर्नबाट बञ्चित समूहको लागि शिक्षा सहयोग गर्ने उदेश्य राखेको सँचालक यादवले थपे ।