पूर्व राजपाबाट निर्वाचित मेयर मण्डल ठाकुर पक्षमा, रोजे लोसपा

न्यूज ब्यूरो, जनकपुरधाम । धनुषाको जनकपुरधाम उपमहानगरपालिकाका मेयर लालकिशोर साह जनता समाजवादी पार्टीमा उपेन्द्र यादवको पक्षमा सनाखत गर्दा धनुषाको हँसपुर नगरपालिकाका मेयर रामज्ञान मण्डलले लोकतान्त्रिक समाजवादी पार्टी (लोसपा) मा सनाखत गरेका छन् ।

पूर्व राष्ट्रिय जनता पार्टी (राजपा) बाट निर्वाचित भएर जनप्रतिनीधि भएका हँसपुर नगरपालिकाका मेयर मण्डलले ठाकुरको खेमा रोजेका छन् । अहिले धनुषा जिल्लास्थित निर्वाचन कार्यालय र प्रदेश निर्वाचन कार्यालयमा सनाखत गर्ने जनप्रतिनीधिहरुको भीड छ ।

विगतमा पूर्व राजपाबाट नै निर्वाचित भएका मण्डलले उत्पीडनमा परेका जनताको पक्षमा वकालत गर्नको लागि महन्थ ठाकुरको पक्षमा गएको बताएका छन् ।

यसअघि उपेन्द्र यादवको खेमामा गएको खवर समाजिक सँजालहरु आएपनि उनले आफू विधिवत र अधिकारिक रुपमा ठाकुरको पक्षमा सनाखत गरेको बताएका छन् । उनी पूर्वमन्त्री एवम् लोसपाका नेता उमा शँकर अरगरियाको नजिकी मानिएका छन् ।