महावीर युवा कमिटीको अध्यक्षमा गुप्ता पनि बलियो उम्मेदवार

न्यूज ब्यूरो, जनकपुरधाम । जनकपुरधामस्थित महावीर युवा कमिटीको भदौ १२ गते भोली (शनिबार) का दिन हुन लागेको निर्वाचनमा अध्यक्ष पदका उम्मेदवार अजय कुमार गुप्ताको नाम पनि चर्चामा रहेको छ ।

अध्यक्ष पदमा उम्मेदवारी दिएका चारजनामध्ये सबैभन्दा कान्छो उम्मेदवार भनिएको अजयको चर्चा कमिटि भित्र चुलिएको छ । अन्य उम्मेदवारहरुको समेत पलरा भारी नै रहेको छ भने अजयको पनि चर्चा उत्तिकै रहेको छ । चारैजनाबीच भारी प्रतिष्पर्धा हुने देखिएको छ ।

विगतको निर्वाचनमा झिनो मतान्तरले पराजित भएका अजय यसपालि अध्यक्ष पदका लागि उम्मेदवारी दिएका छन् ।

महावीर युवा कमिटीको विगतका बर्षहरुमा अध्यक्षमा एकपटक पराजित भएका उम्मेदवार अर्कोपटक जित्दै आईरहेको विगतलाई हेर्दा अजयको पनि जित्ने सम्भावना उत्तिकै रहेको उनी दाबी गर्छन् ।

करिव डेढ दशकदेखि कमिटीसँग आबद्ध रहेका उनी कार्यकारिणी सदस्यदेखि महासचिवसम्मको सफल कार्यकालको भूमिका निर्वाह गरिसकेका छन् । महावीर युवा कमिटीले प्रत्येक वर्ष भव्यताका साथ आयोजना गर्दै आईरहेको राजदेवी पूजाको विभिन्न कार्यक्रमहरुमा समेत अजयले संयोजकको भूमिका निर्वाह गरिसकेका छन् ।

अजय कुमार गुप्ता अध्यक्ष पदका चारजनै उम्मेदवारहरुमध्ये सबैभन्दा कान्छो र सबैभन्दा बलियो उम्मेदवारको रुपमा चर्चा भईरहेको सुनिएको छ ।

उनले आफू यस पदमा निर्वाचित भए कमिटीको सबैभन्दा महत्पूर्ण कार्यक्रमको रुपमा रहेको राजदेवी पूजाका साथै युवाहरुको चौतर्फि विकासका लागि समय समयमा नयाँ नयाँ योजनाहरु ल्याउने प्रतिबद्धता जनाएका छन् ।

समाजसेवा संस्थाको मुख्य उद्देश्य रहेकोले सामाजिक कार्यहरुमा बढि संलग्न हुने बताउँदै अजयले खेलकुदको विकाससँगै विभिन्न प्रकारका स्वास्थ्य शिविरहरुको समेत आयोजना गर्ने प्रतिबद्धता जनाएका छन् ।

उनले भने,‘धर्म, संस्कृतिको संरक्षण सम्बद्र्धन गर्नुका साथै युवाहरुको व्यक्तित्व विकासका लागि विभिन्न सीपमूलक तालिमहरु समेत समय समयमा आयोजना गर्नेछु । रोजगारीका लागि सिलाई कटाई, ब्यूटिसियन, कम्प्युटर सहित विभिन्न व्यवसायिक सीपमुलुक तालिमको व्यवस्थापन गराउनेछु ।’

युवाहरूको आधारभूत अधिकारको प्रत्याभूति गर्दै युवा सशक्तीकरणको माध्यमबाट सामथ्र्यवान, उद्यमशील, सिर्जनशील तथा वैज्ञानिक एवं सकारात्मक सोचयुक्त समृद्ध युवा तयार गरी समाजको आर्थिक, सामाजिक र सांस्कृतिक जीवनमा अर्थपूर्ण योगदान दिन सक्ने गरी युवाहरूलाई नेतृत्वदायी भूमिकामा स्थापित गराउन आफ्नो भूमिका अर्थपूर्ण रहने उनको दावी छ ।

गुप्ताले समाजप्रति जवाफदेहि र उत्तरदायित्व वहन गर्ने एवं लोकतान्त्रिक प्रणालीप्रति प्रतिवद्ध रहन सक्ने गरी बनाउन विशेष कार्यक्रमहरू सञ्चालन गर्ने प्रतिबद्धता व्यक्त समेत गरेका छन् ।

४ सय २८ जना सदस्य आवद्ध रहेको महावीर युवा कमिटीमा ११ सदस्यीय कार्यसमितिका लागि २६ जनाले उम्मेदवारी दिएका छन् । अध्यक्ष पदमा अजयसहित ४ जना उम्मेदवार प्रतिस्पर्धामा छन् ।