सिरहाः प्रहरी हिरासतको ग्रील काटेर थुनुवा यादव फरार

न्यूज ब्यूरो, सिरहा । प्रदेश नम्बर २ स्थित सिरहा जिल्लाको ईलाका प्रहरी कार्यालय लहानबाट एक थुनुवा ग्रील काटेर फरार भएका छन् ।

इलाका प्रहरी कार्यालय लहानबाट लागुऔषध मुद्दामा पक्राउ परेको सिरहाको नवराजपुर गाउँपालिका वडा नम्बर १ बस्ने पशुपति यादव ग्रील काटेर फरार भएका हुन् ।

इलाका प्रहरी कार्यालय लहानको चरम लापरवाहीको कारण थुनुवा यादव फरार भएको बताईएको छ । यादव लागु औषध मुद्दामा गत जेठ २० गते पक्राउ परेको थिए भने म्याद थप गरी उनलाई अनुसन्धानको क्रममा थुनुवामा राखिएको थियो ।

शनिबार विहान करिब २ः०० बजेकै समयमा यादव ग्रील काटेर फरार भएको हो । जानकारी अनुसार, इलाका प्रहरी कार्यालय लहानको केही प्रहरीले आर्थिक प्रलोभनमा उनलाई योजनाबद्ध तरिकाले भगाएको हुनुपर्ने अनुमान गरिएको छ ।

२४ सै घण्टा पहरा र कडा सुरक्षा रहेको इलाका प्रहरीमा ग्रील काटदा पनि थाहा नपाउनु योजनाबद्ध तरिकले भगाएको हुन सक्ने अनुमान गरिएको छ ।

फरार यादवको खोजी भइरहेको जिल्ला प्रहरी कार्यालय सिरहाका प्रहरी नायव उपरिक्षक एवमं प्रहरी प्रवक्त सुवास बुढाथोकीले बताए ।