सर्लाहीको रामनगर गाउँपालिका अध्यक्ष वर्माको मृत्यू

न्यूज ब्यूरो, सर्लाही । सर्लाहीको रामनगर गाउँपालिका अध्यक्ष कृष्णप्रसाद बर्माको ६७ वर्षको उमेरमा निधन भएको छ ।

सर्लाहीको पश्चिमी भूभागमा अवस्थित रामनगर गाउँपालिकाका अध्यक्ष बर्माको काठमाडौको मेडिसिटी हस्पिटलमा शनिबार राति १२ बजे उपचारको क्रममा मृत्यु भएको हो ।

लामो समयदेखि मधुमेह तथा बिपिको समस्या बाट ग्रसित रहेको अध्यक्ष बर्माको उपचारका क्रममा शनिबार राति निधन भएको गाउँपालिका उपाध्यक्ष नितुदेवी यादवले जानकारी दिईन्।

एक्कासी उहाँको स्वास्थमा समस्या भएपछि यही असार १४ गते मेडिसिटी हस्पिटल भर्ना गरिएको थियो। ब्लड प्रेसर बढेपछि नाक र मुख बाट रगत आएपछि आइसियुमा भर्ना गरिए पनि स्वास्थ्यमा सुधार नभएपछि गए राति नै उपचारका क्रममा शनिबार राति १२ बजेर ५ मिनेटमा मृत्यु भएको रामनगर गाउँपालिकाका निमित प्रशासकीय अधिकृत कृष्ण कुमार यादवले जानकारी दिए ।

अध्यक्ष बर्माको शव घर ल्याउने तयारी भइरहेको र हिन्दू परम्पराअनुसार अन्त्येष्टि गरिने रामनगर गाउँपालिकाले जनाएको छ ।

रामनगर गाउँपालिका वडा नम्बर १ मा स्थायी घर भएको बर्मा वि.स. २०७४ सालको स्थानीय तहको निर्वाचनमा नेकपा माओवादी केन्द्रका उम्मेदबार बाबुलाल रायलाई पराजित गरी नेपाली काँग्रेसबाट रामनगर गाउँपालिका अध्यक्षमा निर्वाचित भएका थिए ।

गाउँपालिका अध्यक्ष बर्माको निधन भएपछि अहिले गाउँपालिका नै शोकमा डुबेको छ । उहाँको मृत्यू भएपछि आम नागरिकहरुले एउटा सक्षम र सबल नेतुत्वकर्ता गुमाएको छ ।

विगत २० बर्षदेखि जनप्रतिनिधि विहिन रहेको स्थानिय निकायमा वर्मा चुनाव जिते लगत्तै स्थानिय स्तरमा विकास निमार्णले तिब्रता पाएको थियो ।