जनकपुरः आफ्नै बुवालाई खलले हानेर छोराले गरे हत्या

न्यूज ब्यूरो, जनकपुरधाम । प्रदेश २ को अस्थायी राजधानी जनकपुरधामदेखि केही दुरीमा रहेको ऐतिहासिक धनुषाधामस्थित छोराले आफ्नै बुवाको हत्या गरेको छ ।

खेत जमिन सम्बन्धी अँशको विवाद हुँदा धनुषाधाम नगरपालिका वडा नम्बर १ काशिपुर टोल बस्ने अन्दाजी बर्ष ७० का विशो यादवलाई उनकै छोरा श्रीकृष्ण यादवले हत्या गरेको हो ।

अँश सम्बन्धी विवाद हुँदा बिशोको कान्छो छोरा बर्ष ३५ का कृष्ण यादवले बुबाको हत्या गरेको इलाका प्रहरी कार्यालय धनुषाधामका प्रहरी निरीक्षक सुरेश ठाकुरले जनाए ।

उनका अनुसार राति सुतेका बुबा विशोलाई कृष्णले मसला कुट्ने खलले प्रहार गरि हत्या गरेका हुन् । बिहान हत्या भएको अवस्थामा देखेपछि स्थानीयले प्रहरीलाई खबर गरेका थिए ।

इलाका प्रहरी कार्यालय धनुषाधामले घटनास्थलको मुचुल्का गरी पोस्टमार्टमका लागि प्रादेशिक अस्पताल जनकपुर पठाएको छ । घटनामा संलग्न छोरा कृष्णालाई पक्राउ गरी थप अनुसन्धान गरिरहेको प्रहरीले जनाएको छ ।

बुबा विशो राति ११ बजे खाना खाएर सुतेका थिए । कान्छो छोरा कृष्णसंग विवाद हुने गरेको थियो । विशोका तीन छोरा छन् ।