जनकपुर सहित धनुषामा लकडाउन खुकुलो, पसल अब ११ बजेसम्म खुल्ने

न्यूज ब्यूरो, जनकपुरधाम । जिल्ला प्रशासन कार्यालय धनुषाले छैठो पटक लकडाउनको अवधी थप गरेको छ । सो क्रममा आजदेखि पुनः ७ दिनको लकडाउन थप गरिएको हो ।

धनुषाका प्रमुख जिल्ला अधिकारी बन्धु प्रसाद बास्तोलाले लकडाउनलाई केही खुकलो बनाउँदै पसल सँचालनको लागि सुविधा दिएका छन् । यसअघि ९ बजेसम्म मात्र खोल्न पाइने पसलहरु अब विहान ११ बजेसम्म खोल्न पाइने भएको छ ।

जिल्ला संकट व्यवस्थापन समिति धनुषाको सोमबार बसेको बैठकले आगामी असार ७ गते राति १२ बजेसम्मका लागि निषेधाज्ञालाई जारी राख्ने निर्णय गरेको हो ।

प्रजिअ बास्तोलाले निर्माण सामग्री लगायतका अतिआवश्यकीय व्यवसायहरु बिहान ५ बजेदेखि बिहान ११ बजेसम्म र औषधि तथा स्वास्थ्य सेवासँग सम्बन्धित पसलहरु चौबिसैं घण्टा स्वास्थ्य सुरक्षाका मापदण्डको पालना गरी खोल्न बताएको हो ।

त्यस्तै होटल रेस्टुरेन्टहरुले अनलाईन अर्डर तथा होम डेलेभरि र टेक अवे विधिबाट मात्र सेवा सञ्चालन गर्नसक्ने जनाइएको छ । रात्रीकालिन व्यवसाय सञ्चालनमा भने रोक लगाइएको छ ।

यसका साथै, उल्लेखित बमोजिम निषेधाज्ञाको उलँघन भए सोही अनुसार कारवाही गरिने पनि बताइएको छ । जनकपुरमा लकडाउनको प्रभाव भएपनि ग्रामिण भेकमा भने यसको शून्य प्रभाव देखिएको छ ।

कोरोना सँक्रमणको दर पनि दिनानुदिन कम हुँदै गएपछि स्थानीय प्रशासनले केही हदसम्म लकडाउनलाई खुकुलो बनाउँदै गएको हो ।