महिलाको सुनको सिक्री लुटने दुई युवक स्पोटमै पक्राउ

न्यूज ब्यूरो, वीरगँज । प्रदेश २ को वीरगँजबाट लुटपाट तथा चोरीको आरोपमा प्रहरीले तीन जनालाई पक्राउ गरी सार्वजनिक गरेको छ ।

गत बैशाख ७ गते करिब २ बजेको समयमा वीरगँज महानगरपालिका वडा नम्बर ११ श्रीपुर बस्ने प्रकाश रौनियारको घरबाट ल्यापटप तथा मोबाइल लगायतका धनमाल चोरी गरेको आरोपमा तीन जनालाई पक्राउ गरेको हो ।

जिल्ला पर्सा जगरनाथपुर गाउँपालिका वडा नं. ६ बस्ने वर्ष १९ को मुन्ना कुमार रामले सो दिन घरमा कोही नभएको मौका छोपी घरमा पसेर समानहरु चोरी गरेको आरोपमा पक्राउ गरिएको हो ।

सोही क्रममा गत सोमबार करिब २ बजेको समयमा पर्सा प्रहरीले उनको घरको खानतलासी लिँदा चोरी भएको डेल कम्पनीको ल्यापटक १ थान, भिभोको मोबाईल एक थान उनले सुत्ने कोठाबाट बरामद भएपछि पक्राउ गरिएको प्रहरीले जनाएको छ ।

रीतपूर्वक बरामद भएको हुँदा निजलाई तत्काल नियन्त्रणमा लिई मँगलबार चोरी मुद्दामा पर्सा जिल्ला अदालतबाट म्याद थप गरी थप अनुसन्धान भइरहेको जनाएको छ ।

यस्तै, मँगलबार बीरगँज महानगरपालिका वडा नम्बर ११ श्रीपुर बस्ने वर्ष ४५ की सकुन्तला मेहताले वीरगञ्ज वडा नम्बर ८ घण्टाघरस्थित तरकारी बजारमा तरकारी किन्दै गर्दा उनले घाँटीमा लगाएको सुनको सिक्री लुट्नेलाई पनि पक्राउ गरिएको छ ।

वीरगँज महानगरपालिका वडा नं. १६ बस्ने वर्ष १९ को निरज नट बर्ष १९ को युवराज रायलाई तत्कालै अस्थायी प्रहरी पोष्ट घण्टाघरको टोलीले उनलाई सिक्रीसहित नियन्त्रणमा लिएको थियो ।

जानकारी अनुसार, उनका समूह विगतदेखि नै पर्सा जिल्लाका विभिन्न स्थानमा भएका सुनको सिक्री लुट्ने घटनाहरूमा संलग्न भएको खुल्न आएको छ ।