अभियन्ता एवम् सँचारकर्मी साहलाई सत्य बोलेकै भरमा पक्राउ, प्रहरीको चौतर्फी आलोचना

न्यूज ब्यूरो, वीरगँज । समाजिक अभियन्ता एवम् सँचारकर्मी समेत रहेका वीरगँजका युवा सौरभ साहलाई प्रहरीले सत्य बोलेकै कारण पक्राउ गरिएको भन्दै चौतर्फी आलोचना भएको छ ।

जिल्ला प्रहरी कार्यालय पर्साले सामाजिक अभियन्ता सौरभ साहलाई मँगलबार पक्राउ गरेपछि उनलाई तत्काल रिहाईको माग गरिएको हो ।

सामाजिक सञ्जालमा चिकित्सकमाथि आँच आउने गरि लेखेको भन्दै उनलाई प्रहरीले मंगलबार पक्राउ गरेको हो ।

पर्सामा कमेडियन आदर्श मिश्राको बुबाको उपचारका क्रममा निधन भएपछि अस्पतालको लापरवाहीले मृत्यू भएको कुरामा अभियन्ता साहले समर्थन जनाएको र उक्त कुरालाई समर्थन गर्दै साहले पनि सामाजिक सञ्जालमा अस्पताल र चिकित्सकको वेथितिबारे लेख्दै आएका थिए ।

न्यूज ब्यूरोका पर्सा जिल्ला सँवाददाता (स्ट्रीञ्जर) समेत रहेका साहले हस्पिटलका कर्मचारी, डाक्टरलाई धम्काएको, सामाजिक सञ्जालमा आपत्तिजनक कुरो लेखेको उजुरी परेपछि उनी पक्राउ परेका हुन् ।

अदालतबाट ५ दिनको म्याद थप गरि अनुसन्धान भईरहेको उनले बताए । चिकित्सकको उजुरीपछि सौरभलाई मंगलबार १०–११ बजेतिर प्रहरीले अभिभावकको साथमा प्रहरी कार्यालय बोलाएको थियो ।

जहाँ दुवै पक्षबीच सहमति नभएपछि अभिभावकलाई घर फर्काएपनि प्रहरीले भने सौरभलाई थुनामा राखेको हो । सौरभ पक्षका एक अभियान्ताले सामाजिक सञ्जालमा युवाहरुले आफूलाई चित्त नबुझेको कुरा आक्रोस पोख्दै आएको भन्दै यसरी थुनामा राख्नु गलत भएको बताए ।

सौरभको पक्षमा अन्य अभियन्ता सहित सँचारकर्मीहरुले उनलाई तत्काल रिहा गर्नुपर्ने माग गरेको छ । सत्य बोलेकै भरमा प्रहरीले दबाबमा आएर सँचारकर्मीलाई पक्राउ गरी सत्यको आवाज दबाउन खोजेको र नारायणी अस्पताल तथा चिकित्सकको लापरवाहीलाई ढाकछोप गर्न खोजेको आरोप पनि लगाइएको छ ।

उनका बुबा विगत ४ वर्षदेखि मिर्गौलाको समस्यासँग जुध्दै आएका थिए । मिश्राले एक भिडियो सार्वजानिक गर्दै आक्रोस पोखेका थिए ।