सिरहाः बिना उपभोक्ता समिति र टेन्डरकै कालोपत्रे, रकम झवाम्म पार्ने नेताको दाउ

न्यूज ब्यूरो, सिरहा । प्रदेश २ को सिरहा जिल्लास्थित बिना उपभोक्ता समिति र टेन्डर नै नलगाई रकम पार्ने दाउमा कालोपत्रे सुरु गरिएको बुझिएको छ ।

सिरहाको गोलबजार नगरपालिका वडा नम्बर ७ स्थित सडकमा कालोपत्रे भइरहेको छ । सो ठाउँमा कुनै टेन्डर वा उपभोक्ता समिति बिना नै काम भइरहेको बताईएको छ ।

गोलबजार नगरपालिका वडा नम्बर ७ का वडाध्यक्ष जगत श्रेष्ठ लगायत गाउँकै उनका आसेपासे सहित गाउँले नेताहरु मिलेर रकम झवाम्म पार्ने दाउमा लागेको बताइएको छ । उनीहरु मिलेर नक्कली काम गरेपछि गाउँलेहरु अवरोध समेत गरेका छन् ।

गाउँमा कालोपत्रे गरिदा कतै १२ फिट चौडाई त कतै १३ फिट चौडाई गरेपछि स्थानीयहरु समेत आन्दोलित भएका छन् । वडाध्यक्ष र सोही ठाउँका ठेकेदारले मनपर्दी गरेपछि गाउँलेहरुले विरोध जनाउँदै सडक निर्माण कार्य रोक्का गरेका छन् ।

गाउँलेहरुले १३ फिटको बाटोमा हरेक ठाउँमा एकनाशे सडकको चौडाई हुनुपर्ने माग गरेको छ । तर, वडाध्यक्ष र ठेकेदारले आफ्नो मान्छेको जमिन पर्ने ठाउँबाट सारेर अर्कोपट्टि बढी लम्ब्याएर सडक बनाउन थालेपछि विरोध गरिएको हो ।

सो सन्दर्भमा गोलबजार नगरपालिका कार्यालय प्रमुख इन्जिनियर जय प्रकाश सहनीले सडकको चौडाई लम्बाई तथा विवादको बारेमा केही थाहा नभएको प्रतिक्रिया दिएका छन् । सो ठाउँमा साइट ईन्जिनीयर रितेश झाले समेत बर्षाका कारण जान नपाएको प्रतिक्रिया दिएका छन् ।