आज जनकपुरमा दिप प्रज्वलन सहित दिपावली

न्यूज ब्यूरो, जनकपुरधाम । पूर्व राष्ट्रिय जनता पार्टी (राजपा) नेपालका कार्यकर्ताहरुले आज जनकपुरमा दीप प्रज्वलन सहित दिपावली गर्ने कार्यक्रम गरेका छन् ।

जनता समाजवादी पार्टी (जसपा) नेपालका प्रथम अध्यक्ष महन्थ ठाकुर र नेता राजेन्द्र महतोको अडानले राष्ट्रपतिले नागरिकता विद्येयक २०७८ जारी गरेको भन्दै सोही खुसीयालीमा दिपावली र दीप प्रज्वलन गर्ने कार्यक्रम राखिएको बताइएको छ ।

जसपाका युवा नेता प्रशान्त झाले उपेन्द्र यादवले दुई बर्ष सरकारमा बसेर पनि पूरा गराउन नसकेको माग महन्थ र राजेन्द्र पक्षले सरकार बाहिरै रहेर पूरा गराउन सफल भएको दाबी गरे ।

उनले नेताद्धय ठाकुर र महतोको कारण नागरिकताबाट बञ्चित करिब साढे पाँच लाख मधेशी समुदायका व्यक्तिहरुले बँशज नागरिकता पाउने भएपछि जनकपुरमा दीप प्रज्वलन र दिपावली गरिएको बताए ।

सोही क्रममा जसपाका अर्का युवा नेता किसन साहले जनता समाजवादी पार्टी नेपालको राष्ट्रीय अध्यक्ष महन्थ ठाकुर एवं जसपा नेपालको संसदीय दलको नेता राजेन्द्र महतोको मधेशी मुद्दा प्रतिको अडानको प्रतिफल भेटाएको भन्दै दिपावली गर्न आग्रह गरे ।

उनले आज करीब ५ लाख मधेशी नागरिकको नागरिकता विधेयक प्रमाणीकरण भएको सो को उपलक्ष्यमा सम्पूर्ण मधेशी एवं नागरिकताबाट बंचित समुदायले आज बेलुका ७ः०० बजे आ–आफ्नो घरमा दीपावली मनाई यस निर्णयको स्वागत गर्न अनुरोध गरे ।

अहिले केही बेरमा साँझ ७ बजे जनकपुरको जनक चोकमा वृहत रुपमा समाजिक दुरी कायम गरी दीप प्रज्वलन र दिपावली मनाएको युवा नेता झाले बताए ।