मधेस आन्दोलन : मलेठ घटनाको आज एक वर्ष पूरा !

न्यूज ब्यूरो ||
जनकपुरधाम, २३ फागुन । मधेस आन्दोलनको क्रममा सप्तरीको मलेठमा भएको घटनाको आज एक वर्ष पुरा भएको छ ।

गत फागुन २३ गते नेकपा एमालेको मेची–महाकाली अभियान अन्तर्गत सप्तरीको मलेठमा आयोजित कार्यक्रम स्थल नजिकै झडप हुँदा प्रहरीको गोली लागेर पाँच जनाको मृत्यु भएको थियो ।

मृत्यु हुनेमा सप्तरी मलेठका सञ्जन मेहता, पीताम्बर मण्डल र वीरेन्द्र महतो, प्रसवनीका आनन्द साह र जमुनी मधेपुराका इन्द्रदेव यादव थिए ।

त्यति बेला उपप्रधान एवम् गृहमन्त्री रहेका नेपाली काँग्रेसका नेता विमलेन्द्र निधिले गत जेठमा सदरमुकाम राजविराजमा आयोजित कार्यक्रममा मलेठ घटनामा मृत्यु भएका पाँचै जनालाई शहीद घोषणा गरे ।

व्यवस्थापिका संसदको समाजिक न्याय तथा मानवाधिकार समितिले सप्तरीको मलेठ घटना छाविनका लागि त्यतिबेला कांग्रेस सांसद रहेका मोख्तार अहमदको नेतृत्वमा ५ सदस्यीय उपसमिति गठन गरेको थियो।

समितिमा एमालेका बसुन्धरा रोकाया, माओवादी केन्द्रका दुलारी हरिजन, राप्रपा नेपालका श्यामसुन्दर टिबडेवाल र फोरम लोकतान्त्रिकका उषा यादवले नेतृत्व गरेको थियो ।

प्रतिवेदनमा मानव अधिकारको उलंघन र प्रहरीले बर्बरतापूर्ण अन्यायपूर्ण व्यवहार गरेको भनेर उल्लेख गरिएको थियो ।

गत बर्ष २०७३ फागुन २३ गते एमालेको मेची महाकाली अभियानको क्रममा चलिरहेको तेस्रो मधेस आन्दोलनको क्रममा मधेसी जनताहरुले विरोध गर्दा प्रहरीले टाउको र छातीमा ताकी ताकी गोली प्रहार गरी ५ जनालाई मृत्यूको घाट उतारेका थिए ।

#वीरशहिदहरुप्रति त्रिनेत्र न्यूज नेटवर्क र न्यूज ब्यूरो हार्दिक श्रद्धाञ्जली व्यक्त गर्दछ ।