गाउँपालिका अध्यक्षका छोराले दलितलाई खुट्टामा लगाए जँजीरताला, २ दिनसम्म दिएन खाना र पानी

न्यूज ब्यूरो, राजविराज । प्रदेश नम्बर २ को सप्तरी जिल्लास्थित एक युवकलाई दुई दिनसम्म जँजीरले बाँधेर खाना, पानी नदिएको आरोप लगाइएको छ ।

सप्तरी जिल्लाको छिन्नमस्ता गाउँपालिकाका अध्यक्ष सूर्यनारायण मण्डलका छोरा तेजनारायण मण्डलले चोरी गरेको आरोपमा खुट्टा जँजीर त्यसमा ताला लगाएर यातना दिएको आरोप लगाइएको छ ।

गत बैशाख २१ गते छिन्नमस्ता गाउँपालिका वडा नम्बर ६ कुपही रम्पुरा टोलस्थित एक मदिरा पसलमा चोरी भएपछि स्थानीय रामस्वरुप मुखियाको छोरा बर्ष २० शिव कुमार मुखियालाई दुई दिनसम्म एक घरमा जनावर जस्तै बाँधेर याताना दिएको आरोप स्थानीयको छ ।

वडा नम्बर ६ को कुपही र रम्पुरालाई जोडने झोलुङ्गे पुलस्थित गत बैशाख २१ मदिरा पसल सँचालक संजय कुमार पंडितको पसलमा चोरी भएपछि सोही आरोपमा उनलाई पक्राउ गरी अमानवीय तवरले यातना दिएको बताइएको छ ।

चोरीको घटना बाहिरिएपछि खोजबिनको क्रममा शिवकुमारलाई स्थानीयहरुले उनको घरबाटै समातेर डर धम्कीको आधारमा चोरी स्वीकार गर्न लगाएको स्थानीय कपिल मुखियाले जानकारी दिए । उनका अनुसार, सो चोरी घटनामा अन्य दुई जना सँलग्न रहेको र उनीहरु फरार रहेको छ ।

सो घटनामा स्थानीय सरोज मण्डल र निशित मुखिया समेतको सँलग्नता रहेको बताइएको छ । यता, इलाका प्रहरी कार्यालय सखडाले भने शिवकुमारको घरबाट चोरीको समान बरामद भएको बताउँदै सोही आरोपमा स्थानीय जनप्रतिनीधिहरुले गाउँमै मिलाउने भनेर राखेको बताए ।

घटनाको जानकारी पाएलगत्तै जिल्ला प्रहरी कार्यालय सप्तरी र इलाका प्रहरी कार्यालय सखडाबाट गएको सँयुक्त टोलीले छानबिन गर्दा गाउँपालिका अध्यक्ष सूर्यनारायण मण्डलले स्थानीय स्तरमै घटना मिलाउने प्रयास गरेको भनेपछि प्रहरी फिर्ता भएको बताएको छ ।

चोरीको बिहानपख स्थानीयहरुले कतिको चोरी भएको सोधेपछि पसले पण्डितले सुरुमा ३० देखि ४० हजार रुपैयाँको चोरी भएको बताएपनि गाउँमा पँचायत हुँदा १ लाख ४० हजार अर्थात १ लाख रुपैयाँ थप भनेपछि चोरीको आरोपमा पक्राउ परेका र फरार भएका अभिभावकले ४७ ४७ हजार रुपैयाँ तिर्ने सहमित भएको थियो ।

सो समयमा उनीहरुले सो रकम तिर्ने नसक्ने भएपछि कपाली तमसुक बनाउने निर्णय गरेको थियो । त्यसपछि अभिभावकहरुले सो रकम तिर्नबाट अस्वीकार गरेपछि गाउँपालिका अध्यक्षका छोरा तेजनारायण मण्डलले राणाकालिन शैलीमा प्रहरीलाई समेत गाली गलौज गर्दै मुखियालाई जनावर जस्तै दुई दिनसम्म बाँधेर यातना दिएको आरोप छ ।

सो अघि अध्यक्षका छोरा मण्डलले शिवकुमार मुखियालाई निर्घात कुटपिट गरी दुवै खुट्टामा जँजीर लगाएर ताला हानिदिएका थिए । दुई दिनसम्म उनलाई खाना वा पानी कसैले दिएनन भने खाना वा पानी दिन जानेलाई समेत अध्यक्षका छोराले हप्काउने र गाली गरेपछि उनलाई खानापिना कसैले पनि दिएनन् ।

त्यसपछि भोलीपल्ट गाउँपालिका अध्यक्ष सूर्यनारायण मण्डलले समेत शिवकुमारलाई पुनः कुटपिट गरी यातना दिएको बताइन्छ । २२ गतेदेखि नै शिवकुमारलाई जँजीरमा बाँधेर शरिर बन्धक बनाएर राखेका गाउँपालिका अध्यक्ष र उनका छोरालाई प्रहरीले अझै कारवाही गर्न सकेका छैनन् ।

खाना लिएर गएका स्थानीय कपिल मुखियालाई समेत अध्यक्षका छोराले गाली गलौज गर्दै शिवकुमारका बुवालाई थप्पडै थप्पड हानेको आरोप छ । गएराती सहमतिमा शिवकुमारको खुट्टाको जँजीर खोलाएर लगिएपछि सहमित अनुसार पुनः अध्यक्षको जिम्मा लगाएपछि अध्यक्ष मण्डलले शिवकुमारलाई निर्घात कुटपिट गरेको आरोप पीडितको छ ।

जानकारी अनुसार, गाउँपालिका अध्यक्ष सूर्यनारायण मण्डलको मदिरा पसलेसँग अधिक साँठगाँठ भएको कारण एक दलितसँग अमानवीय व्यवहार गरेको हो ।

यस सन्दर्भमा गाउँपालिका अध्यक्ष मण्डलसँग कुरा बुझन खोज्दा आरोप निराधार रहेको तथा जसले जानकारी दिएको उसैले कुटेको जस्ता शब्दहरु निकाले । अहँकारभरिको शब्दमा अध्यक्ष मण्डलले केही पनि नगरेको प्रतिक्रिया दिए ।

यता, इलाका प्रहरी कार्यालय सखडाका प्रहरी सहायक नीरिक्षक (सई) महेन्द्र प्रसाद यादवले भने चोरीको समान बरामद भएको मात्र प्रतिक्रिया दिए ।