लहान प्रकरणः बजारको जग्गामा गैर कानुनी टहरा बनाएपछि नगरपालिकाले भत्कायो : मेयर साह

न्यूज ब्यूरो, सिरहा । लहान नगरपालिकाका मेयर मुनी साहले बजारको जग्गामा केही जनाले अवैद्यानिक रुपले टहरा बनाएपछि टहरा भत्काएको बताएका छन् ।

जनताको निजी जग्गामा रहेका दर्जनौ घरपरिवारलाई उठिवास गराएको भन्दै आक्रोसित स्थानीयहरुले नगर प्रहरीसँग समेत लडेपछि उनले सो टहरा गैर कानुनी रहेकोले भत्काएको दाबी गरेका छन् ।

लहान नगरपालिकाको वडा नम्बर ५ स्थित रहेको खुट्टी खोला छेउमा रहेको सुरतलाल चौधरी, रोशन साह, एजुन र मोहितलाल चौधरीले बनाएको टहरामा डोजर चलाएपछि स्थानीयहरु आक्रोसित बनेका छन् ।

बुधबार मेयर मुनी साहले आफ्ना वडाध्यक्ष सुलेमान अन्सारीको नेतृत्वमा निजी जग्गामा रहेको एक दर्जन घरपसल डोजर चलाएर भत्काएको आरोप छ । तर, मेयर साहले सो जग्गामा जाली रजिष्टरी गरेको दाबी गरेका छन् ।

उनले भने, –“सो जग्गा खाली गर्नको लागि विगत एक बर्षदेखि पत्राचार गर्दै आएका थियौं । नगरपालिकाले सो सार्वजनिक जग्गामा नेहा बजार लगाउनको लागि पत्राचार गर्दै जग्गा खाली गर्न बारम्बार पत्राचार गरेपनि अटेरी गरेपछि अन्तिम समयमा डोजर चलायौं ।”

उचित ब्यवस्थापन नै नगरी घर टहरा बलपूर्वक भत्काउन लाग्दा झडप समेत भएको छ । नगरपालिकाले डोजर लगाएर भत्काउन लाग्दा स्थानीयले प्रतिकार गरेका छन् ।

करिब ३० वर्ष अगाडि नगरपालिकाले नै मन्जुरी दिएको उक्त जग्गा एकासी आएर भत्काउन लागेको स्थानीयले आरोप लगाएका छन । कोभिडको बेला नागरिकलाई दुःख दिएको भन्दै उनीहरुले असन्तुष्टि जाहेर गरेका छन् ।

जग्गा धनीहरुले जग्गाको कर प्रत्येक बर्ष नगरपालिकालाई बुझाउँदै आएको दाबी गरिएको छ । तर, मेयर साहले सो जग्गाको रजिष्टरी नै फर्जी भएको र यसको लागि छानबिन भइरहेको बताए ।

न्यूज ब्यूरोसँगको कुराकानीमा मेयर साहले आफूमाथि लगाएको सार्वजनिक जग्गामा घर बनाएको आरोप निराधार रहेको बताए । उनले आफ्नो घर एलानी जग्गामा भए प्रमाणित गर्न चुनौति पनि दिए ।